Blokcheın qarjy salasyn túbegeıli ózgertedi - Saıasat Nurbek
ASTANA. QazAqparat - «Astana» Halyqaralyq qarjy ortalyǵynyń basqarýshy dırektory Saıasat Nurbektiń oıynsha, jaqyn arada blokcheın sııaqty jańa qarjy tehnologııalary qazirgi júıeni túbegeıli ózgertedi, dep habarlaıdy QazAqparat tilshisi.
«Menińshe, biz bul úrdisti toqtata almaımyz. Jaraıdy, qazir úlken saýdagerlik sıpaty bolyp, artynan qulap qalsa da, bul úrdisti toqtatý múmkin emes. Atalǵan tehnologııa 5-10 jyldyń ishinde bank salasyn, jalpy qarjy sektorynyń ınfraqurylymyn túbegeıli ózgertýi ábden múmkin. Bul meniń jeke pikirim», - dedi Saıasat Nurbek QazAqparat tilshisine bergen suhbatynda.
Onyń aıtýynsha, búginde krıptavalıýtalarǵa qatysty ár eldiń ustanymy ártúrli bolsa da, «Astana» Halyqaralyq qarjy ortalyǵynyń basshylyǵy atalǵan úrdistiń bolashaǵy bar dep sanaıdy.
«Keleshekte qarjy salasynda úlken ózgerister bolýy múmkin. Sondyqtan biz osy basymdyqty jiberip almaıyq degen nıetpen krıptovalıýtalar naryǵyn test retinde iske asyrýdy kózdeımiz. Biz kez kelgen kompanııany shaqyramyz. Olar elektrondy aqsha salasyndaǵy óz tehnologııalaryn testileıdi. Sol testileý alańynan myqty bir ónim shyqsa, biz ony aqyryndap qarjy ortalyǵymyzdyń tıimdiligin arttyrý úshin paıdalanatyn bolamyz», - dep atap kórsetti S.Nurbek.
Aıta keteıik, búgin Úkimet úıinde ótken baspasóz máslıxatynda «Astana» Halyqaralyq qarjy ortalyǵynyń basqarýshysy Qaırat Kelimbetov EKSPO aımaǵynda qurylatyn bırjada krıptovalıýtalar sııaqty jańa qarjy texnologııalardyń bolatynyn málimdedi.
«Bylaısha aıtqanda, qazirgi EKSPO aımaǵy bolashaqta «krıptoaılaqqa» aınalady degen senim bar» , - dedi Q.Kelimbetov.
QazAqparat tilshisine suhbat bergen «Astana» HQO-nyń tsıfrlyq texnologııalar boıynsha dırektory Ásel Jıenbaeva atalǵan bastama qalaısha iske asatynyn túsindirip berdi.
