Blokbeketti jasyryn aınalyp ótken 21 jastaǵy aqtóbelik qamaldy
AQTÓBE. QazAqparat – Aqtóbede tótenshe jaǵdaı rejımin buzǵan 77 derek tirkeldi. 21 jastaǵy júrgizýshi ata-anasyna barý úshin blokbeketti aınalyp ótken, dep habarlaıdy QazAqparat tilshisi.
Aqtóbelik polıtseıler táýlik boıy qala men oblys aýmaǵyna kirip, shyǵatyn joldaǵy blokbeketterde kezekshilik qoıdy. Óńirde 28 blokbeket bolsa, onyń jeteýi Aqtóbe qalasynyń aınalasyna koıylǵan.
«Polıtsııa qyzmetkerleri jergilikti atqarýshy organ ókilderimen jáne medıtsına qyzmetkerlerimen birge jumys isdeıdi. 31 naýryzdan bastap bas sanıtar dárigerdiń qaýlysyna sáıkes Aqtóbe oblysy erekshe tártipke kóshti. Basqa aımaqqa shyǵý jáne kirý joldary jabyldy. Tek tranzıttik kólikter júre alady. Ári qoǵamdyq oryndarda patrýldik polıtsııanyń jumystary kúsheıtildi. Esepte turǵan adamdarmen aldyn alý sharasy júrgizildi», - dedi oblystyq polıtsııa departamentiniń bastyǵy Atyǵaı Arystanov.
Aıta keteıik, «Samara-Shymkent» tasjolyndaǵy bir blokpost arqyly táýlik saıyn 2 myńǵa jýyq avtokólik ótedi. Negizinde polıtsııa qyzmetkerleri tranzıttik júk kólikterin, azyq-túlik, dári-dármek, aýyl sharýashylyǵy ónimderin tasymaldaıtyndardy ótkizedi, ózgesine aýmaq jabyq. Bir táýlik ishinde polıtsııa qyzmetkerleri 1 tártip buzýshylyq faktisin anyqtady. 31 naýryz kúni qala syrtyna aınalmaly jolmen shyqpaq bolǵan 21 jastaǵy azamatty Alǵa aýdanyndaǵy blokbekette ustady. Ol Aqtóbeden shyǵyp, Qandyaǵash qalasyndaǵy ata-anasyna barmaq boldy. Atalǵan fakti boıynsha QR ÁQBtK 476-baby boıynsha ákimshilik hattama toltyryldy. Aqtóbelik sot sheshimimen 5 táýlikke qamaldy.
«Polıtsııa qyzmetkerleri 77 quqyq buzý deregin anyqtady. ÁQBtK-niń «Tótenshe jaǵdaı rejımin buzý» baby boıynsha 69 derek, «Tótenshe jaǵdaı kezinde quqyq tártibin buzýǵa ıtermeleıtin is-áreketter» baby boıynsha 8 fakti anyqtaldy. Qarǵaly aýdanynyń Badamsha aýylynda jergilikti dámhananyń ákimshisi ákimshilik jaýapqa tartyldy. Dámhana saǵat 22:00-de jumysyn toqtatpaǵan. ÁQBtK 476-baby boıynsha 10 AEK kóleminde aıyppul salyndy», - dedi oblystyq PD baspasóz qyzmetiniń jetekshisi Erbolat Sarqulov.
