Blok-beketterge qatysty jalǵan aqparat taratqandar izdestirilip jatyr - Erjan Sádenov
NUR-SULTAN. QazAqparat – Blok-beketterden tamyr-tanys arqyly ótý múmkin emes. Bul týraly Nur-Sultan qalasy Polıtsııa departamentiniń basshysy Erjan Sádenov málim etti, dep habarlaıdy QazAqparat tilshisi.
Habar 24 telearnasynda ótken onlaın brıfıngide tilshiler blok-beketterden tamyr-tanys arqyly ótý múmkin degen aqparat taraǵanyn, osy oraıda bul qaýeset qanshalyqty shyndyqqa janasatynyn surady.
«Osy tektes jalǵan aqparattar taraǵan bolatyn. Biz osyndaı jalǵan aqparat taratqandardy izdep tabamyz. Bizde jeke qaýipsizdik basqarmasy bar. Osyndaı ár málimetti tolyq ári naqty tekseremiz. Jalpy, ondaı faktiler joq, bolýy da múmkin emes dep sendirgim keledi», - dedi E. Sádenov.
Budan buryn habarlanǵandaı, elordada karantın rejimin buzǵan 300-den astam adam jaýapqa tartyldy.
Belgili bolǵandaı, blok-beketterde 98 adam jazaǵa tartyldy, onyń ishinde 80 adam qamaldy, 14 adamǵa aıyppul salyndy, 4 is sotta qaralýda.
Sonymen qatar, qalada 30 avtokólik arnaıy aıyppul turaǵyna qoıyldy.
