Blok-beketten ótý úshin azamattar kýáligin alyp júrýge mindetti
NUR-SULTAN. QazAqparat - Elordada karantın engizilýine baılanysty qurylǵan blok-beketten ótý úshin azamattar mindetti túrde jeke kýáligin ózimen birge alyp júrýi kerek. Bul týraly Nur-Sultan qalalyq polıtsııa departamenti bastyǵynyń orynbasary Aıdos Rysbaev aıtty, dep habarlaıdy QazAqparat tilshisi
«Nur-Sultan qalalyq polıtsııa departamenti koronavırýs ınfektsııasy taralýynyń aldyn alý jáne jolyn kesý boıynsha sharalar qabyldaýda. Elordalyq polıtsııa jeke quramy jumys atqarýdyń erekshe tártibine aýystyryldy. Polıtsııa departamenti 22 naýryz kúni saǵat 00-00-de elordaǵa kiretin jáne shyǵatyn joldardyń jabylatynyn eskertedi. Kólik keptelisi men kezekte turmas úshin qala turǵyndary men qonaqtaryna aldyn ala tıisti sharalar qabyldaýǵa keńes beremiz. Blok-bekettegi polıtsııa qyzmetkerlerine kórsetý úshin ózderińizben birge mindetti túrde jeke kýálik jáne basqa da qujattaryńyzdy alyp júrýdi usynamyz», - dedi Aıdos Rysbaev «Habar 24» telearnasynyń tikeleı efırinen.
Onyń atap ótýinshe, Nur-Sultan qalasynyń aýmaǵy boıynsha jaqyn mańdaǵy Jibek joly, Qosshy, Qaraótkel, Talapker, Qoıandy kentterin qosa alǵanda barlyq baǵytta 7 beket qoıyldy. Júk avtokólikteri úshin tranzıtttik júrý Nur-Sultan qalasy mańyndaǵy aınalma avtojol boıynsha qarastyrylǵan.
«Karantınniń birinshi kúni tynysh ótti. Polıtsııa qyzmetkerleri eki mınýttyń ishinde planshet kómegi arqyly elektrondy baza boıynsha tekserý júrgizdi. Tekserý barysynda shydamdylyq pen túsinistik tanytqan avtokólik júrgizýshileri men jolaýshylarǵa alǵys aıtamyz. Engizilgen sharalar azamattardyń qaýipsizdigin qamtamasyz etý úshin qajet»,- dedi ol.
