«Blogıada - 2014» qazaqtildi blogerler saıysynyń bas júldesine 1 mln. teńge tigilip otyr
ASTANA. QazAqparat - Búginnen bastap "Sapaly kontentke - mıllıon!" atty qazaq blogerleriniń jazba jarysy bastaldy.
Bul týraly "Báıterek" halyqaralyq baspasóz klýbynda ótken brıfıngte Qazaqstan softerlik kompanııalar qaýymdastyǵynyń prezıdenti Azamathan Ámirtaı málim etti.
Onyń aıtýynsha, búginnen bastap naýryzdyń 20-syna deıin kez kelgen bloger saıysqa tirkele alady. Al 23 naýryzda Qaraǵandy qalasynda ótetin blogerler quryltaıynda eń úzdik 32 blogerge jarysty odan ári jalǵastyrýǵa sertıfıkat tabystalady. Kelesi kezeńge 16 bloger ótedi. Odan keıingi kezeńde 8 bloger fınaldyq kezeń úshin talasady. Blogıadanyń kúzde ótetin sońǵy kezeńinde aqtyq básekege shyqqan 4 blogshy ózara jyldyń úzdigin anyqtaıdy. 2 aıdan turatyn ár kezeń arasynda bir apta úzilis beriledi.
"Osy blogıadany uıymdastyrýdaǵy basty maqsatymyz qazaqtildi blogerlerimizdi qoldaý arqyly qazaq ınternet salasyn belgili deńgeıge kóterý. Qazaqsha blogtar arqyly jastarǵa patrıottyq sezim, memleketshildik, ulttyq rýh dánegin sebý", - dep atap ótti A. Ámirtaı.
Sharany Qazaqstan softerlik kompanııalar jáne Ulttyq ınternet qaýymdastyqtary birlesip uıymdastyryp otyr. Saıystyń bas júldesine 1 mln. teńge tigilgen.
