Blogerlikten Aqordada salynǵan kartınaǵa deıin — sýretshi Ásel Bekjanmen suhbat
ALMATY. KAZINFORM — Óziniń shyǵarmashylyq jolyn tapsyrysqa sýret salýdan bastap qazir óziniń erekshe kartınalary arqyly elge tanylǵan kásibı sýretshi, ónertaný ǵylymdarynyń magıstri, bloger Ásel Bekjanmen (assolyaa) Kazinform tilshisi suhbattasty.
— Ózińiz týraly aıtyp berseńiz. Qansha jasyńyzdan bastap sýret sala bastadyńyz?
— Men Almaty qalasynda dúnıege keldim. Qazir jasym 30-da. Ónerge, onyń ishinde sýret salýǵa degen súıispenshiligim bala kezimnen bar. Sondyqtan 14 jyldan astam ýaqyt osy qabiletimdi damytý úshin bilim aldym. Astana qalasyndaǵy Balalar kórkem sýret mektebin, keıin Qazaq ulttyq óner ýnıversıtetiniń kolledji men ýnıversıtetin oqyp bitirdim. 2021 jyly Almaty qalasyndaǵy T.Júrgenov atyndaǵy Qazaq Ulttyq Óner akademııasynyń ǵylymı-pedagogıkalyq magıstratýrasyn támamdadym.
— Qaı ýaqyttan bastap áleýmettik jelilerdi júrgize bastadyńyz? Oǵan ne sebep boldy?
— Men jeke blogymdy 2021 jyldyń qańtar aıynda bastadym. Tapsyryspen sýret salýdan sharshap, ózim úshin shyǵarmashylyqpen aınalysamyn dep sheshtim. Meniń áleýmettik jeliler úshin arnaıy salǵan alǵashqy sýretim — «Samaltaý» ánine arnalǵan Dımash Qudaıbergenniń portreti edi. Osy kartınamen 3-4 túrli beınejazbany Tiktok pen Instagram-da jarııaladym. Dımashtyń jankúıerleri meni birden qoldady, shamamen 70 myń qaralym boldy. Bul nátıjege men qatty tańqaldym jáne bul isimdi jalǵastyrý kerek ekenin túsindim.
— Eki qolmen birdeı sýret salýdy qalaı úırendińiz?
— Ol úshin men kóp tájirıbe jasadym. Ártúrli materıaldar men ádisterdi qoldandym. Aldymen bir ýaqytta 2 portretti salýǵa tyrystym. Biraz tájirıbeden keıin ol qolymnan keldi. Sodan keıin bir ýaqytta 3 portret saldym. Osy tájirıbelerdiń nátıjesinde jeke rekordym — bir ýaqytta 6 portret boldy.
— Áleýmettik jelide úlken aýdıtorııa jınaǵannan keıin ómirińiz qalaı ózgerdi?
— Shyǵarmashylyq adam úshin tanymal bolý óte mańyzdy. Ol jańa jetistikterge, jańa bıikterge shabyttandyrady. Áleýmettik jelilerde jumys istegen 3 jyl ishinde meniń sýretterime degen suranys edáýir ósti. Meni barlyq jerde adamdar tanyp, iri brendter jumys isteı bastady. Menińshe, áleýmettik jelilerdegi beınejazbalarym búkil óner salasyna oń áser etýde dep oılaımyn. Bul mamandyqtyń jalpy mártebesin arttyrady. Qazir men shetelde kórmeler de jasaımyn. Sondyqtan ómirim blogerlikten keıin jaqsy jaqqa ózgerdi.
— Byltyr Memleket basshysy Qasym-Jomart Toqaev pen Reseı prezıdenti Vladımır Pýtınge sýret salǵanyńyzdy bárimiz kórdik. Osy kezdesýge qalaı shaqyrtý aldyńyz?
— Kezdesýden birneshe kún buryn maǵan Astana qalasynyń ákimdiginen habarlasty. Olar maǵan joǵary dárejeli qonaqqa syılyq retinde sýret salýǵa usynys aıtty. Basqa eshteńe naqtylaǵan joq. Árıne, men birden kelistim. Sol kúni keshke kartına eskıziniń birneshe nusqasyn qaryndashpen aq-qara nusqada jasap, jiberdim. Bir kúnnen keıin maǵan Prezıdent ákimshiliginen habarlasyp, ıdeıa men eskız unaǵanyn, eskızdi túrli-tústi nusqada pysyqtaý kerektigin aıtty. Solaı prezıdenttermen kezdesýge tap boldym. Adamdar men sol jerdegi sýretti aldyn ala daıyndap, sodan keıin ony aýystyrdym dep oılaıdy. Biraq bul olaı emes. Memleket basshylary salǵan kenepti men 1 kúnde aıaqtadym. Mundaı erekshe sýretti aýystyrý qısyndy bolmas edi, prezıdenttermen birlesip sýret salýdyń qandaı qundylyǵy bar ekenin elestetip kórińiz.
— Aqorda men Kreml arasynda kópir sýretin beıneleý ıdeıasy qalaı keldi?
— Maǵan salynatyn sýret eki eldiń dostyǵyn beınelese degen usynys tústi. Sonda birden eki jaǵalaý arasyndaǵy kópir týraly oı keldi. Óıtkeni dıplomatııada «kópir salý» tirkesi jıi qoldanylady. Sondyqtan «dostyq kópirin» salý týraly oıladym. Bul shyn máninde taza shabyt. Men túsindire almaıtyn nárse. Sýrettiń ólshemi 200×130 sm boldy. Ony Prezıdenttermen birge túste salyp bastadym da, kelesi kúni túski asqa deıin aıaqtadym.
— Áleýmettik jeli arqyly ulttyq mádenıetti, ónerdi dáripteýge ne túrtki boldy?
— Bul qazir álemdi mádenı muramyzben tanystyrýdyń jalǵyz tıimdi joly. Mysaly, mende 13 mıllıon qaralym jınaǵan beınejazba bar. Onda patshaıym Tomırıstiń portretin jáne Gaýhar batyrdyń portretin saldym. Olar ekeýi de ádemi qalpynda, ulttyq kıimmen, ulttyq áshekeılermen salyndy. Muny álemniń túkpir-túkpirinen 13 mıllıon adam kórdi. Osy 3 jyl ishinde meniń paraqshalarymda osy ispettes 350-den astam vıdeo bar. Sondyqtan bul óte tıimdi ádis, men ony jalǵastyra beremin.
— Qaryndash, qolmen jáne ballondar arqyly aq qaǵazǵa, kilemge sýret salasyz. Mundaı shyǵarmashylyq ıdeıalar qaıdan týyndaıdy?
— Iá, men kóp tájirıbe jasaımyn. Shyǵarmashyl adam retinde men árqashan jańashyldyqty izdeımin, álemdegi jańa trendterdi ustanamyn. Batysta, Shyǵysta ne bolyp jatqanyn kórip, ony ózime beıimdeýge tyrysamyn. Árdaıym bir nárseni ózgertip, tolyqtyryp, biriktirip otyramyn. Odan jańa nárse bolyp shyǵady. Bolashaqta sýretshilerge arnalǵan óndiristik ortalyǵymdy ashýdy josparlap otyrmyn. Men jas sýretshilerge tabysqa jetýge kómekteskim keledi. Meniń oıymsha, ár sýretshige Qazaqstandy tanymal etý jáne dáripteý úshin komanda qajet. Sonda eki jyl ishinde bizdiń elimizde men sııaqty 5-10 sýretshi paıda bolýy múmkin. Bul bizdiń beıneleý ónerimizdiń qaıta órleý dáýiri bolady.
Eske salsaq, byltyrǵy jyldyń 28 qarashasynda Qasym-Jomart Toqaev Qazaqstanǵa memlekettik sapary aıaqtalǵan Vladımır Pýtındi elorda áýejaıynan shyǵaryp salyp, sýretshi Ásel Sabyrjanqyzy Reseı prezıdentine elimizge jasaǵan saparyna arnap salǵan kartınasyn syıǵa tartty.