Bloger Janabylovtarǵa qatysty qylmystyq is qozǵaldy

ASTANA. KAZINFORM – 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovaǵa qatysty qylmystyq is qozǵaldy. Bul týraly Qarjylyq monıtorıng agenttigi tóraǵasynyń orynbasary Jeńis Elemesov habarlady.

– Ol materıaldar bizge tústi. Qazir qylmystyq isti tirkedik. QR Qylmystyq kodeksiniń 214-baby 1-bóligi – zańsyz kásipkerlik faktisi boıynsha qylmystyq is tergelip jatyr. Nátıjesin qosymsha habarlaımyz, – dedi J.Eleemesov Senat kýlýarynda.

Agenttik ókiliniń aıtýynsha, blogergege qatysty áli eshqandaı bultartpaý sharasy qoldanylǵan joq.

Sonymen birge, blogerlerdiń el aýmaǵynda ekeni aıtyldy.

Eske sala ketsek, jelide birneshe avtokólik utysyn jarııalaǵan qazaqstandyq blogerler Erbolat Janabylov pen Elmıra Tólegenova áreketin Týrızm jáne sport mınıstrligi nazaryna aldy. Keıin is sotqa jetken edi. 

Sondaı-aq Týrızm jáne sport mınıstrligi Oıyn bıznesin jáne lotereıany retteý komıtetiniń ókilderi bloger Erbolat Janabylov jarııalaǵan kýrs baǵasy negizsiz qymbat ekenin málimdedi.

5 qyrkúıekte Astanada bloger Erbolat Janabylovqa qatysty alǵashqy sot otyrysy ótti.

Atalǵan jaıtqa qatysty Týrızm jáne sport mınıstri Erbol Myrzabosynov jeke túsinik berdi.