Janabylovtar taǵylǵan aıyppen kelise me — blogerdiń jubaıy jaýap berdi
ASTANA. KAZINFORM — Elordada bloger Erbolat Janabylov pen Elmıra Tólegenovaǵa qatysty qylmystyq is boıynsha sot protsesi bastaldy. Іsti aýdanaralyq sottyń sýdıasy Ádilbek Baımahanov qarap jatyr.
Memlekettik aıyptaýshy Oljas Haırýllaevtyń aıtýynsha, aıyptalýshylar zańsyz kásipkerlik arqyly 274 mıllıon teńge kóleminde tabys tapqan. Onyń 60 mıllıon teńgesi depozıttik shottarǵa salynyp, nátıjesinde 560 myń teńge kóleminde qosymsha paıda túskeni anyqtalǵan.
Sot sanktsııasymen 10 avtokólikke, onyń ishinde Lamborghini Urus jáne Lexus LX 600 kólikterine, sondaı-aq 17 dana Apple iPhone uıaly telefonyna tyıym salyndy. Memlekettik aıyptaýshynyń málimetinshe, tárkilengen múliktiń barlyǵy «Jańa bıznes» JShS atyna tirkelgen.
Aıyptaý aktisi jarııalanǵannan keıin sot tóraǵasy aıyptalýshylardan taǵylǵan aıyppen kelisetin-kelispeıtinin surady. Alaıda blogerler bul suraqqa naqty jaýap berýden bas tartty.
— Qazirgi kezeńde bul suraqqa jaýap berýden bas tartamyn. Sebebi qorǵaýshymmen birge óz ustanymymyz bar. Biz ony sotta jaýap berý barysynda, barlyq kýálardan jaýap alynyp, is materıaldary tolyq zerttelgennen keıin ǵana málimdeımiz. Sol kezde bul máselege qatysty pikir bildiremin, — dedi Elmıra Tólegenova.
Eske salaıyq, Erbolat Janabylov pen Elmıra Tólegenovaǵa Qylmystyq kodekstiń 214-baby (zańsyz kásipkerlik) jáne 218-baby (qylmystyq jolmen alynǵan qarajatty zańdastyrý) boıynsha aıyp taǵylyp otyr.
Aıta keteıik, 2025 jyly 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovanyń áreketi Qazaqstan Respýblıkasynyń Týrızm jáne sport mınıstrligi nazaryna ilikken bolatyn.
2025 jylǵy 26 tamyzda Erbolat Janabylovqa qatysty Ákimshilik quqyq buzýshylyq týraly kodeks boıynsha hattama toltyrylyp, is sotqa joldandy.
Al 2025 jylǵy 16 qazanda blogerlerge qatysty ákimshilik sıpattaǵy is qylmystyq óndiriske aýystyryldy.
Alaıda 13 naýryzda ótken aldyn ala sot tyńdalymynda Janabylovtardyń advokaty Gaýhar Aıtjanova isti prokýratýraǵa qaıtarýdy suraǵan. Sot bul ótinishti qanaǵattandyrýdan bas tartty.