Blogerler taǵy 600 mln teńge salyq tóleýi tıis – Erjan Birjanov
ASTANA. KAZINFORM – Elimizde 854 bloger tabystaryn 72 mlrd teńgege tómendetip kórsetken. Bul týraly Qarjy mınıstri Erjan Birjanov aıtty.
- Biz bloger, jýrnalıst nemese saýda-sattyq ornynda saýda jasaıtyn sýbekti dep bólmeımiz. Barlyq salyq tóleýshi salyq zańnamasy aıasynda mindettemelerin oryndaýy tıis. Ol - zańda, Salyq kodeksinde kórsetilgen mindet. Degenmen, bul sanatqa (blogerler) monıtorıng júrgizemiz. Bir jyldyń ishinde 1 586 habarlama 854 blogerge jiberildi. Olardyń tabysy 72 mlrd teńgege tómendetilgeni týraly habarlama berildi. Sonyń aıasynda jumys istelindi. 622 bloger qosymsha salyq nysandaryn tapsyrdy. Tabystaryn 18,3 mlrd teńgege ulǵaıtyp, 1 mlrd teńgedeı salyq tóledi. Endi taǵy 600 mln teńge salyq tóleýge nusqama berildi, - dedi vıtse-mınıstr Úkimet otyrysynan keıin.
Onyń aıtýynsha, qazirgi ýaqytta 7 blogerge qatysty tekserý júrip jatyr. Olardyń qosymsha sanalǵan salyq mólsheri 10 mln teńgeden asady.
- Eger osy sharalardan keıin óz erkimen tólemese jáne somasy joǵary bolsa, onda quqyq qorǵaý organdaryna júginý arqyly óndiremiz. Ókinishke oraı olardyń aty-jónderin aıta almaımyz. Salyq qupııasy sanalady, - dedi Erjan Birjanov.
Aıta keteıik, Іshki ister mınıstrlgi zańsyz oıyn bıznesin uıymdastyrǵany úshin halyqaralyq izdeýde júrgen bloger Qaısar Hamzany ustady.
