Bloger Rýslan Jenpeıisov 25 táýlikke qamaýǵa alyndy
Shymkent qalalyq Polıtsııa departamentinen málim etkendeı, 12 sáýir kúni Shymkent qalasyndaǵy «Kapal batyr» kópiriniń janyndaǵy blokpostta polıtseıler toqtatqan kólikterdiń arasynda «Opel» avtomashınasy bolǵan. Karantın kezinde qalada júrip-turýǵa ruqsat qujattaryn tekserý barysynda júrgizýshi Bıbarys Raıymbekov (Rýslan Janpeıisov esimimen tanymal bloger) «Adil Stroi Project» JShS-da zańger bolyp jumys isteıtini týraly anyqtama usynǵan.
«Onyń sózinshe, sol anyqtama negizinde polıtseıler ony kedergisiz ótkizýi tıis bolǵan. Onymen birge, anyqtalǵandaı, atalmysh JShS qazirgi ýaqytta qala ishinde eshqandaı jumystar atqaryp jatqan joq. Azamattarǵa, sonyń ishinde ishki ister organdaryna zańdy saqtaý qajettigin aıtyp júretin bloger tekseris barysynda quqyqtyq tártipti buzýǵa árekettendi. Ol qujattar tekserilgennen keıin de polıtsııa qyzmetkerleriniń jumysyna kedergi keltirýdi jalǵastyrdy. Vıdeo jazyp, áleýmettik jelilerde translıatsııa júrgizdi. Solaısha, olardyń blokposttaǵy jumystaryna kedergi jasady», - dedi polıtsııada.
Bıbarys Raıymbekovke qatysty QR Ákimshilik quqyqbuzýshylyq týraly kodekstiń 476-ynshy (Tótenshe jaǵdaı rejımin buzý) jáne 478-baptaryna (Tótenshe jaǵdaı kezinde quqyqtyq tártipti buzýǵa ákep soǵatyn áreket jasaý) sáıkes ákimshilik hattamalar toltyryldy.
«14 sáýir kúni vıdeokonferentsııa túrinde ótken sot protsesinde TJ rejımin buzýshyǵa 10 táýlikke ákimshilik qamaýǵa alý taǵaıyndaldy. Sondaı-aq sot anyqtaǵandaı, azamat Raıymbekov tótenshe jaǵdaıdyń engizilýine baılanysty quqyqqorǵaý organdary qyzmetkerleriniń tarapyna óziniń narazylyq sózderin bildirip, is-áreketimen quqyqtyq tártipti buzýǵa árekettendi. Tikeleı efırdegi translıatsııada óziniń negatıvti pikirlerin bildire otyryp, tótenshe jaǵdaı rejımi jarııalanǵan eldimekende qyzmettik mindetterin atqaryp jatqan laýazymdyq tulǵalarǵa qarsylyq bildirdi. Osyǵan oraı, oǵan 25 táýlikke ákimshilik qamaýǵa alý taǵaıyndaldy», - dedi departamentten.