Bloger Murat Ábdilda qaıtadan qamaýǵa alyndy
TÚRKІSTAN. KAZINFORM - Saýran aýdandyq polıtsııa bólimi sottalýshyny merziminen buryn shartty túrde bosatýdyń kúshin joıyp, jazanyń qalǵan ótelmegen bóligin bas bostandyǵynan aıyrý túrindegi jazaǵa aýystyrýdy suraǵan.
Túrkistan qalasynyń aýdanaralyq sotynda Qazaqstan Respýblıkasynyń Qylmystyq kodeksiniń 174-babynyń 1-bóligimen 2022 jyly sotty bolǵan er adamǵa qatysty usynym qaraldy.
Sottalýshy 2024 jyly sottyń qaýlysy negizinde QK 72-babyna sáıkes shartty túrde merziminen buryn bosatylǵan. Sodan Túrkistan oblysynyń polıtsııa departametiniń Saýran aýdandyq polıtsııa bólimine profılaktıkalyq esepke alynǵan.
Profılıaktıkalyq esepte turǵanyna qaramastan, ol 2024 jyly ortaq paıdalaný ornyn lastaǵany úshin ÁQBtK 434-2 babynyń 1-bóligimen ákimshilik jaýapqa tartylyp, oǵan aıyppul salynǵan. Sonymen qatar, 2025 jyldyń aqpan-naýryz aılarynda 5 ret tirkelýge kelmegen jáne 4 ret túngi ýaqytta turǵylyqty mekenjaıynda bolmaǵan.
- Sot qaýlysymen Túrkistan oblysy polıtsııa departamentiniń Saýran aýdandyq polıtsııa basqarmasynyń usynymy qanaǵattandyryldy. Er adamdy merziminen buryn shartty túrde bosatýdyń kúshi joıylyp, jazanyń qalǵan ótelmegen bóligi 2 jyl 11 kúnin bas bostandyǵynan aıyrý túrindegi jazaǵa aýystyryldy. Er adam sot zalynan qamaýǵa alyndy. Qaýly zańdy kúshine engen joq, - delingen Túrkistan oblystyq sotynyń baspasóz qyzmeti usynǵan aqparatta.
Aıta keteıik, budan buryn 12 jasar qyzdy azǵyndyqqa ıtermelegen er adam sottalǵanyn jazǵan bolatynbyz.