Bloger Mahambet Abjannyń otbasy músheleriniń banktik shotyna shekteý qoıylǵan joq – Antıkor

NUR-SULTAN. QazAqparat – QR Sybaılas jemqorlyqqa qarsy is-qımyl agenttigi iri kólemde aqsha bopsalady degen kúdikpen qamaýǵa alynǵan jýrnalıst-bloger Mahambet Abjannyń otbasy músheleriniń banktik shotyna shekteý qoıylǵanyn joqqa shyǵardy, dep habarlaıdy QazAqparat tilshisi atalǵan vedomstvoǵa silteme jasap.

«Kúdikti M. Abjannyń otbasy músheleriniń, onyń ishinde kámeletke tolmaǵan balalarynyń banktik shottaryna shekteý qoıylǵany týraly Telegram arnalardyń birinde aqparat tarady. Bul aqparattyń shyndyqqa sáıkes kelmeıtinin habarlaımyz», - degen málimdeme taratty Antıkor.

Habarlamada aıtylǵandaı, tergeý aıasynda kúdiktiniń banktik shotyna ǵana shekteý qoıylǵan.

«Jalǵan aqparat qoǵamdyq pikirdi basqarý jáne tergeýge áser etý maqsatynda taratylady. Azamattardan resmı aqparat kózine súıenýin suraımyz», - dep habarlaıdy agenttikten.

Eske salsaq, jýrnalıst-bloger Mahambet Abjan kásipkerden 50 mln teńge bopsalady degen kúdikpen qamaýǵa alynǵan edi.

5 shildede Nur-Sultan qalasynyń mamandandyrylǵan aýdanaralyq tergeý soty kúdiktige qatysty 2 aı kúzetpen ustaý sharasyn sanktsııalady.