Bloger Qaısar Hamza ustaldy

ALMATY. KAZINFORM – ІІM zańsyz oıyn bıznesin uıymdastyrǵany úshin halyqaralyq izdeýde júrgen bloger Qaısar Hamzany ustady.

– Qazaqstan Respýblıkasy Іshki ister mınıstrligi Interpol arnalary arqyly Vetnam Sotsıalıstik Respýblıkasynyń quqyq qorǵaý organdarymen ózara is-qımyl nátıjesinde Kamran qalasynda zańsyz oıyn bıznesin uıymdastyrǵany úshin halyqaralyq izdeýde bolǵan bloger Q.-ny ustady, - delingen habarlamada.

Vedomstvonyń málimetinshe, bloger áleýmettik jelilerde onlaın-kazınolardyń jarnamalyq beınematerıaldaryn júıeli túrde jarııalap, paıdalanýshylardy qumar oıyndarǵa tartqan.

Zańsyz áreketteriniń saldarynan kúdikti 100 mln teńgeden astam kólemde zańsyz tabys tapqan. Aqsha onyń atyna tirkelgen krıptovalıýta ámııanyna aýdarylyp otyrǵan. Qazirgi ýaqytta ony Qazaqstan Respýblıkasyna ekstradıtsııalaý máselesi qarastyrylyp jatyr.

– Shetelge jasyryný áreketteri qylmystyq jaýapkershilikten bosatpaıdy, izdeýde júrgen árbir adam ustalyp, Qazaqstanǵa jetkiziledi, - dep habarlady ІІM.

Eske salaıyq, buǵan deıin Qazaqstan Respýblıkasynyń Qarjylyq monıtorıng agenttigi Qazaqstan Respýblıkasynyń azamaty 1995 jylǵy 18 qyrkúıekte týǵan, Qamza Qaısar Baqytjanulyna halyqaralyq izdeý jarııalaǵanyn habarlaǵanbyz.

Sotpen oǵan qatysty «qamaýda ustaý» túrindegi bultartpaý sharasy sanktsııalanǵan.