Bloger Erbolat Janabylovtyń jubaıyna qatysty sot protsesi bastaldy

ASTANA.KAZINFORM – Astanadaǵy mamandandyrylǵan aýdanaralyq ákimshilik sotynda tanymal bloger Elmıra Tólegenovaǵa qatysty is qaralyp jatyr.

Sot protsesi QR Ákimshilik quqyqbuzýshylyq týraly kodeksiniń 445-1-baby, 6-bóligi boıynsha sýdıa Aqerke Bekturǵanovanyń qaraýymen ótip jatyr. Atalǵan is blogerdiń zańsyz lotereıa qyzmetine qatysy bar degen kúdikke baılanysty qozǵalǵan.

Sonymen qatar búgin tústen keıin Tólegenovanyń jubaıy – bloger Erbolat Janabylovqa qatysty sot otyrysy ótedi.

Aıta keteıik, atalǵan eki tulǵa da mıllıonnan astam jazylýshysy bar tanymal blogerler. Sot otyrystary ashyq formatta ótip jatyr. Osy iske qatysty alǵashqy tyndaý 5 qyrkúıekte ótken bolatyn.

Eske sala keteıik, sot otyrysy barysynda Týrızm jáne sport mınıstrligine qarasty lotereıa jáne oıyn bıznesin retteý komıtetiniń ókilderi blogerlerdiń paraqshalarynda aqsha, 10 avtokólik jáne basqa da qymbat syılyqtar oınatylǵanyn aıtty. Alaıda Qazaqstan zańnamasyna sáıkes, lotereıalardy tek resmı operatorlar ǵana ótkizýge quqyly.

Komıtet ókilderiniń aıtýynsha, olar Janabylovtar usynǵan kýrstardy satyp alyp, olardyń mazmuny jarııalanǵan sıpattamaǵa sáıkes kelmeıtinin anyqtaǵan. Vedomstvo derekterine sáıkes, kýrstar formaldy sıpatqa ıe bolyp, naqty praktıkalyq qundylyq bermegen, sondaı-aq 30 myń teńgelik baǵasy negizsiz, qymbat dep tanylǵan.

Sot isiniń qozǵalýynyń basty sebebi – Janabylovtyń 10 avtokólik oınatylǵan lotereıany ótkizýi bolǵan. Osydan keıin Lotereıa jáne oıyn bıznesin retteý komıtetine blogerlerdiń qyzmetiniń zańnama talaptaryna sáıkestigin tekserý týraly ótinish kelip túsken.