Bloger Ádilethan Moldahandy qamaýda ustaý merzimi 2 aıǵa uzartyldy
ALMATY. KAZINFORM – Zańger ári bloger Ádilethan Moldahanǵa qatysty qylmystyq is boıynsha tergeý jumystary júrip jatyr.
Qalalyq polıtsııa departamenti sotqa deıingi tergep-tekserý sheńberinde sottyń sanktsııasymen oǵan eki aı merzimge qamaýda ustaý túrindegi bultartpaý sharasy qoldanylǵanyn málimdedi.
– Qazirgi ýaqytta istiń barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan qajetti tergeý áreketteri júrgizilip jatyr. Polıtsııa jalǵan aqparatty taratý zańda kózdelgen jaýapkershilikke ákep soǵatynyn eskertedi, - delingen málimdemede.
Eske salaıyq, Almatyda 1 mıllıonnan astam oqyrmany bar bloger Ádilethan Moldahan ustalǵanyn jazǵanbyz. Polıtsııa oǵan qatysty kórineý jalǵan aqparat taratý deregi boıynsha sotqa deıingi tergep-tekserýdi bastaǵan. Bloger áleýmettik jelide quqyqtyq saladaǵy beınejazbalarymen tanymal. Ásirese, onyń Ál-Farabı dańǵylynda bolǵan jol apaty jaıly jarııalaǵan beınejazbalary jelide keńinen tarady.
Buǵan deıin sot qaýlysymen oǵan 10 táýlik merzimge qamaýda ustaý túrindegi bultartpaý sharasy qoldanylǵan bolatyn.
