Bilimge salynǵan ınvestıtsııalar naqty nátıjesin berdi — Juldyz Súleımenova
ASTANA. KAZINFORM — 2019-2025 jyldary bilim salasyna bólinetin qarjy kólemi úsh eseden astam ulǵaıdy. Onyń 65,9%-y ustazdarymyzdyń eńbekaqy qoryna jumsalady. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda málimdedi.
Mınıstrdiń aıtýynsha, oqýshylardy tamaqtandyrý jáne oqýlyqtarmen qamtamasyz etý sharalaryna da turaqty qarjy bólinip jatyr.
Tehnıkalyq jáne kásiptik bilimge qoldaý kúsheıip keledi.
— Eń negizgisi — bilimge salynǵan ınvestıtsııalardan búginde naqty nátıje bar. Qazaqstan halyqaralyq reıtıngterde adam kapıtalynyń damýy, bilim sapasy jáne básekege qabilettilik kórsetkishterinde pozıtsııamyz nyǵaıa tústi, — dedi Juldyz Súleımenova.
Sala mınıstri bilimge degen memlekettik kózqaras ózgergenin de atap ótti.
— Bilim — el bolashaǵyna salynǵan strategııalyq ınvestıtsııaǵa, al muǵalimderimiz — memleketimizdiń adam kapıtalyn qalyptastyratyn negizgi tulǵaǵa aınaldy, — dedi Juldyz Súleımenova.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
