Bilim júıesin dinı fanatızmnen Konstıtýtsııa arqyly qorǵaý kerek – Dıqan Qamzabekuly

ASTANA. KAZINFORM – ASTANA. KAZINFORM – «Qazaq gazetteri» jaýapkershiligi shekteýli seriktestiginiń bas dırektory, Konstıtýtsııalyq komıssııa múshesi Dıqan Qamzabekuly bilim júıesin dinı fanatızmnen qorǵaıtyn norma engizýdi usyndy.

- «Áı deıtin aja, qoı deıtin qoja» joq keıingi shırek ǵasyrda qara-shubar jamylǵy, sóleńdegen suryqsyzdyq, kelte balaq, qaýǵa saqal, seldir saqal qaladan dalaǵa deıin qaptap ketti. Qazaqtyń ımandy, tárbıeli, bilimdi ortasyn qara bult, dúdámal dil (júrek maǵynasynda – red.) basyp alǵandaı kúı keshtik. Ata-anasyn tyńdamaıtyn urpaq, ult dástúrin tárk etken dindarsyrmaqtar paıda boldy. Eń qaýiptisi olar urpaǵyn da jat baǵytta tárbıeleýge kóshti. Fanatızm men kórsoqyrlyq bilim júıesine ene bastady. Nege qateleskenin bilmedik, oqyǵan degen keıbir adamdar shetten kelgen shala saýattylardyń jeteginde ketkeni oılandyrady, qamyqtyrady. Sırııada soǵysqa baryp adasqandardyń tragedııasy sizderge belgili. «Jýsan» operatsııasynyń arqasynda elge oralǵandardyń kóz jasy bárimizdi oılandyrdy, - dedi ol.

Ǵalym dinı ekspansııa tek musylman álemine qatysty emestigin, hrıstıan dúnıesi de, túrli basqa da irili-usaqty múláıimsigen konfessııalar da bilim júıesine entelegenin atap ótti.

- Qazir bul ahýal túzelip keledi. Ádilet, zań men tártip kezeńinde burynǵy áttegenaıǵa, qarańǵylyq qushaǵyndaǵylarǵa jaryq túskendeı. Biraz másele rettele bastady. Konstıtýtsııadaǵy zaıyrlylyq normasy osy zárýlikti ońtaıly sheshedi, qıyndyqtan saqtandyrady dep senemiz. Bilim júıesi, jańashyldyq pen damý, ǵylym men tehnologııa, ınnovatsııa alańy. Bul – ósý men óris, shyǵarmashylyq pen mádenıet ortasy. Dana Abaı men ult ustazy Ahmet Baıtursynulynyń armany osy. Endeshe bilim júıesindegi zaıyrlylyq pen mádenıettiń Ata zańda naqty jazylý zııalylyq dástúrdiń talaby dep bilemiz, - dedi Konstıtýtsııalyq komıssııa múshesi.

Buǵan deıin Konstıtýtsııalyq komıssııanyń quramynda kimder kirgenin jazǵan edik.