Bilim sapasy men halyqtyń densaýlyǵy árbir otbasynyń ál-aýqatyn anyqtaıdy - depýtat
ASTANA. KAZINFORM – Jetisý oblysynyń Úshtóbe qalasynda Quryltaı depýtattary jergilikti turǵyndarmen kezdesip, Prezıdent Qasym-Jomart Toqaevtyń 2026 jylǵy 28 qazandaǵy Joldaýynda aıqyndalǵan negizgi mindetterdi talqylady.
7 qarashada Qaratal aýdanyndaǵy Kemel Toqaev atyndaǵy orta mektepte ótken kezdesýge depýtattar Dana Medeýova, Gúlnaz Atamqulova, Evgenıı Bolgert jáne Ásel Badenova qatysty.
Jıyndy ashqan Dana Medeýova Memleket basshysy Joldaýynyń negizgi baǵyttaryna toqtalyp, bilim berý, densaýlyq saqtaý jáne balalardy qorǵaý máselelerine erekshe nazar aýdardy.
– Bilim sapasy men halyqtyń densaýlyǵy kóbine árbir otbasynyń ál-aýqatyn anyqtaıdy, ol óz kezeginde elimizdiń bolashaǵyn aıqyndaıdy, – dedi depýtat.
Ol densaýlyq saqtaý júıesin damytý, medıtsına qyzmetkerlerin qoldaý jáne memlekettik bastamalardyń tıimdiligin naqty nátıjeler arqyly baǵalaý qajettigin atap ótti.
Qaratal aýdanynyń ákimi Ulan Dosymbekov óńirdiń ınfraqurylymy, ózekti máseleleri men damý josparlary týraly baıandady. Onyń aıtýynsha, Prezıdent Joldaýyndaǵy basymdyqtar aýdannyń áleýmettik-ekonomıkalyq damýy úshin de mańyzdy.
Depýtat Gúlnaz Atamqulova ekonomıkalyq turaqtylyq, salyq saıasaty jáne kásipkerlikti damytý máselelerine toqtaldy. Ol salyq zańnamasy memlekettik bıýdjet kiristerin qalyptastyrýdyń negizgi tetikterin aıqyndaıtynyn, al jınalǵan qarajattyń bir bóligi áleýmettik salany qarjylandyrýǵa baǵyttalatynyn túsindirdi.
Evgenıı Bolgert Qazaqstannyń kólik-logıstıka salasy men tranzıttik áleýetin damytý máselesin kóterdi. Onyń aıtýynsha, elimizdiń geografııalyq ornalasýy Qytaı men Eýropa arasyndaǵy júk tasymalyn ulǵaıtýǵa jáne Qazaqstannyń halyqaralyq saýdadaǵy rólin nyǵaıtýǵa múmkindik beredi.
Al Ásel Badenova jasandy ıntellekt pen jańa tehnologııalardy damytýǵa nazar aýdardy. Depýtat tehnologııalyq múmkindikter keńeıgenimen, adamı kapıtal el damýynyń basty resýrsy bolyp qala beretinin atap ótti. Ol jasandy ıntellektti bilim alýǵa, kásibı biliktilikti arttyrýǵa jáne ózin-ózi damytýǵa tıimdi paıdalaný qajettigin aıtty.
Kezdesý barysynda Úshtóbe turǵyndary depýtattarǵa ózderin tolǵandyrǵan suraqtaryn qoıyp, jergilikti deńgeıdegi ózekti máselelerdi kóterdi.
Depýtattar azamattardy usynystary men ótinishterin jazbasha joldaýǵa shaqyrdy. Árbir ótinish qaralyp, resmı jaýap beriletini aıtyldy.
– Depýtat retinde biz sizdermen turaqty túrde baılanysta bola otyryp, atalǵan ózgeristerdi zańnamalyq turǵydan qamtamasyz etýge qatysyp, olardyń is júzinde oryndalýyn baqylaýymyz qajet, – dedi Dana Medeýova.
Kezdesýde turǵyndarmen turaqty baılanys ornatý, kóterilgen máselelerdi nazarda ustaý jáne Prezıdent Joldaýyndaǵy mindetterdiń oryndalýyna yqpal etý qajettigi atap ótildi.
Aıta keteıik, buǵan deıin Atyraýda jastar, úkimettik emes uıymdar men etnomádenı birlestikterdiń ókilderi Prezıdenttiń 2026 jylǵy Joldaýynda belgilengen mindetterdi talqylaǵan bolatyn. Kezdesýde áleýmettik-ekonomıkalyq damý, halyqty áleýmettik qorǵaý, energetıka jáne ekologııa máseleleri qaraldy.
