Bilim salasyndaǵy jemqorlyqpen kúres: kúmándi tólemder buǵattalady
ASTANA. KAZINFORM — Endi mektepterdegi qarjylyq tólemderge onlaın-monıtorıng júrgiziledi. Ol týraly tolyǵyraq Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtyp berdi.
— Pedagogtardyń eńbekaqy qorynan mıllıardtaǵan qarajattyń urlanýy qoǵamda úlken rezonans týdyrdy. Oqý-aǵartý mınıstrligi jáne Qarjy mınıstrligimen birlesken sharalardyń nátıjesinde táýekeldi basqarý júıesi engizilip, biryńǵaı bultty býhgalterııa qurylyp jatyr Kúmándi tólemderge (somanyń artyq kórsetilýi, jeke jáne bank derekteriniń burmalanýy) onlaın-monıtorıng júrgizilip, ıaǵnı Qazynashylyq organdary salystyrady, negizsiz tólemder buǵattalady, — dedi Danııar Bıgaıdarov vedomstvoda ótken baspasóz máslıhatynda.
Onyń aıtýynsha, tsıfrlyq sheshimder mektepterdiń býhgalterlik esep júıesin biryńǵaı etýge múmkindik berdi.
— Bul eńbekaqy qorynan urlyqty tolyǵymen joıyp, «óli jandar» alaıaqtyq áreketine jol bermeıdi. Osy tásildi jyl sońyna deıin densaýlyq saqtaý, sport, mádenıet, týrızm, ekologııa jáne basqa da salaǵa engizý josparlanyp otyr, — deıdi ol.
Eske salsaq, 2024 jyly Antıkor bilim salasynda jemqorlyq jasaý faktisi boıynsha 302 qylmystyq is tirkedi.