Bilim salasyndaǵy vaýcherlik qarjylandyrý qandaı nátıje berip jatyr
ASTANA. KAZINFORM — Vaýcherlik qarjylandyrý 35 mlrd teńgeden astam qarajatty únemdeýge múmkindik berdi. Bul týraly Oqý-aǵartý mınıstrligi málim etti.
— Qazaqstanda mektepke deıingi bilim berý salasyna vaýcherlik qarjylandyrýdy engizý bıýdjet qarajatyn paıdalaný tıimdiligin arttyrýǵa múmkindik berdi. 2024 jáne 2025 jyldardyń qorytyndysy boıynsha 26,7 mlrd teńge, al 2026 jyldyń birinshi toqsanynda taǵy 8,6 mlrd teńge únemdeldi. Jalpy únem kólemi 35,3 mlrd teńge boldy. Únemdelgen qarajat qosymsha jańa vaýcherler berýge baǵyttalyp otyr, — delingen mınıstrliktiń Kazinform agenttigine bergen jaýabynda.
Pılottyq joba 20 qala men oblystardyń 23 aýdanynda júzege asyrylyp keledi. Oǵan 6 myńǵa jýyq mektepke deıingi uıym qatysyp, balalarǵa 1 mln-nan astam vaýcher berildi. Mehanızm «aqsha balanyń sońynan júredi» qaǵıdaty boıynsha qarjylandyrýdy kózdeıdi. Bul bıýdjet qarajatyn naqty kórsetilgen qyzmet úshin tikeleı baǵyttaýǵa múmkindik beredi. Sonymen qatar ata-analar mektepke deıingi uıymdy ózderi tańdaı alady. Mundaı tásil qarjylandyrýdyń ashyqtyǵyn arttyryp, negizsiz shyǵyndardy boldyrmaýǵa múmkindik beredi.
— Bıýdjet qarajatyn únemdeý jáne ony ataýly paıdalaný kezektiń aıtarlyqtaı qysqarýymen qatar júrip otyr. Mektepke deıingi uıymdarǵa kezekte turǵan balalar sany 160 myńnan 23 myńǵa deıin azaıdy. Bul rette kezekte turǵan balalardy qamtý deńgeıi 96%-ǵa jetti. Mektepke deıingi bilimniń qoljetimdiligin odan ári keńeıtý maqsatynda jańa oryndar ashý jumystary jalǵasyp jatyr. Sońǵy úsh jylda 232 myńǵa jýyq jańa oryn ashyldy. Osylaısha, vaýcherlik qarjylandyrý bir mezgilde eki negizgi mindetti sheshýge múmkindik beredi: balalardyń mektepke deıingi bilimge qoljetimdiligin keńeıtý jáne bıýdjet qarajatyn jumsaýdyń ashyqtyǵy men tıimdiligin arttyrý, — dep atalyp ótken vedomstvo aqparatynda.
Aıta keteıik, 2024 jyldan bastap Qazaqstanda mektepke deıingi uıymdarda vaýcherlik qarjylandyrý júıesi kezeń-kezeńimen engizilip keledi.
