Bilim salasynda jıi jemqorlyq jasalatyn óńirler ataldy
ASTANA. KAZINFORM – Bilim berý salasynda jasalǵan sybaılas jemqorlyq áreketterden memleketke byltyrdan beri 15,1 mlrd teńge shyǵyn kelgen. Tolyǵyraq Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtyp berdi.
«Sybaılas jemqorlyqqa qarsy qyzmet bilim berý salasyndaǵy júıeli jemqorlyq faktileriniń jolyn kesý boıynsha jumysty jalǵastyrýda. 2023 jyldyń basynan beri osy salada barlyǵy 229 qylmystyq is tirkelgen. Olar boıynsha shyǵyn 15,1 mlrd teńgeni qurady. Jymqyrýdyń eń kóp somasy Jetisý, Túrkistan, Qyzylorda, Almaty, Aqtóbe oblystary jáne Almaty qalasynda anyqtaldy», - dedi Danııar Bıgaıdarov agenttikte ótken baspasóz máslıhatynda.
Onyń aıtýynsha, osy ýaqyt aralyǵynda 317 tulǵa qylmys ústinde áshkerelenip, onyń ishinde 144 adam sottalǵan.
«Aqtóbe oblysy boıynsha Sybaılas jemqorlyqqa qarsy qyzmet Shalqar aýdanyndaǵy bilim bóliminiń basshysyna qatysty qylmystyq isti tergeýde. Ol aýdandyq jalpy bilim beretin orta mekteptiń dırektory arqyly qyzmet boıynsha jalpy qamqorlyǵy úshin vedomstvolyq baǵynysty uıymdardyń basshylarynan jalpy somasy 18,5 mln teńge para aldy degen kúdikke ilindi. Sottyń sanktsııasymen bilim bóliminiń basshysy men aýdandyq mektep dırektory qamaýǵa alyndy», - deıdi ol.
