Bilim salasynda tsıfrlandyrý kúsheıip, bıýdjette mıllıardtaǵan qarjy únemdeldi — Syzdyqbekov

ASTANA. KAZINFORM — Shymkent qalasynyń ákimi Ǵabıt Syzdyqbekov Ortalyq kommýnıkatsııalar qyzmetinde ótken baspasóz konferentsııasynda bilim berý salasyndaǵy ózekti máselelerdi sheshý jáne tsıfrlandyrý baǵytynda atqarylǵan jumystardy baıandady.

Ákimniń aıtýynsha, qalada úsh aýysymdy mektep máselesi tolyq sheshilgen. Prezıdenttiń bastamasymen júzege asqan «Keleshek mektepteri» ulttyq jobasy aıasynda 17 300 oryndyq 12 jańa mektep salynyp, tolyǵymen paıdalanýǵa berildi.

— Bıyl bıýdjet esebinen 4 145 orynǵa arnalǵan 8 mekteptiń qurylysy júrgizildi. Onyń ishinde № 50 mekteptiń 575 oryndyq qosymsha ǵımaraty jáne Telman shaǵynaýdanyndaǵy 1 200 oryndyq mektep paıdalanýǵa berildi. Jergilikti bıýdjet esebinen 10 mektepke jáne № 97 balabaqshaǵa kúrdeli jóndeý júrgizildi, — dedi ol.

Memleket basshysy Qasym-Jomart Toqaevtyń sheshimimen Shymkenttegi Prezıdent rezıdentsııasy balalarǵa arnalǵan saýyqtyrý lagerine aınalatyn boldy. Qazir nysan bilim basqarmasynyń balansyna berilip, qajetti jıhazdarmen jabdyqtalyp jatyr.

Sonymen qatar qala ákiminiń aıtýynsha, Prezıdenttiń bıylǵy Joldaýynda aıtylǵan tapsyrmalardy iske asyra otyryp, Shymkentte bilim berý júıesin tsıfrlandyrý baǵytynda birneshe jańa joba engizildi.

Atap aıtqanda, qaladaǵy barlyq mekteptiń beınebaqylaý júıeleri Polıtsııa departamentiniń jedel basqarý ortalyǵyna qosylǵan. Jańa júıe mekteptegi qaýipsizdikti, órt jáne býllıng jaǵdaılaryn baqylaýǵa, sondaı-aq oqýshylardyń sabaqqa qatysýyn qadaǵalap, basqarý tıimdiligin arttyrýǵa múmkindik beredi.

Sonymen qatar ákim mektep oqýshylaryn tegin tamaqtandyrýdy baqylaýǵa arnalǵan tsıfrlyq júıe engizilip, eki aıda 460 mln teńge bıýdjet qarajaty únemdelgenin aıtty.

Oǵan qosa qala ákimi qosymsha bilim berý salasynda shyǵarmashylyq jáne sporttyq úıirmelerge «bir bala — bir oryn» qaǵıdasymen biryńǵaı vaýcherlik júıe iske qosyldy. Bul júıe úıirmeler sapasyn arttyryp, baqylaýdy kúsheıtti jáne 1,8 mlrd teńge bıýdjet qarjysyn únemdedi dedi.

— Bilim berý salasyndaǵy ashyqtyqty qamtamasyz etý jáne jemqorlyq táýekelderin azaıtý úshin barlyq aqparattyq platformalardyń qarjylandyrý protsesterin baqylaý júıesi engizilip jatyr, — dedi ol.

Eske sala keteıik, endi býllıng týraly aqparat túsken jaǵdaıda ol jaýapty tulǵaǵa birden tirkeledi.