Bilim salasynda Prezıdent tapsyrmalaryn oryndaý qarqyndy júrip jatyr - ǵalym
Ǵylym jáne joǵary bilim mınıstrligi Memleket tarıhy ınstıtýtynyń bas ǵylymı qyzmetkeri, dotsent Maral Qalıeva Prezıdenttiń saılaýaldy baǵdarlamasyn iske asyrýǵa qatysty pikir bildirdi, dep habarlaıdy Kazinform.
«Bir jyl buryn Prezıdent Qasym-Jomart Toqaev «Ádiletti Qazaqstan: bárimiz jáne árqaısymyz úshin. Qazir jáne árdaıym» atty óziniń saılaýaldy baǵdarlamasyn tanystyrǵan bolatyn. Onda el damýynyń jańa ári mańyzdy baǵyttary kórsetilgen. Memleket basshysy balalardyń turǵylyqty jerine qaramastan irgeli bilimge, tsıfrlyq tehnologııalarǵa jáne qolaıly bilim ınfraqurylymyna teń qol jetkizýdi kózdeıtin sapaly bilimniń róli ósip kele jatqanyn erekshe atap ótti. Sonymen qatar, muǵalimderge de aıryqsha mańyz berilip otyr. Atap aıtqanda, joǵary aqparattyq jáne ınnovatsııalyq tehnologııalar jaǵdaıynda úzdiksiz jańartylatyn bilimdi damytý mańyzdy basymdyqqa aınalady», - dedi M. Qalıeva.
Onyń aıtýynsha, qazirgi qoǵamnyń tez ózgeretin ómir súrý jaǵdaılary quzyrettiligi men komandada jumys isteı bilý qabileti bar, sondaı-aq kommýnıkatıvtiligi men utqyrlyǵy bar joǵary bilikti mamannyń mańyzyn ashyp otyr.
Halyqaralyq bilim keńistigi baǵytyndaǵy belsendi ıntegratsııa sapaly bilimge suranys deńgeıin aıtarlyqtaı arttyrady.
«Memleket basshysynyń tapsyrmasyn oryndaý baǵytynda jyl basynan beri 55 myńnan astam oqýshy ornyna arnalǵan biraz mektep paıdalanýǵa berildi. 2023 jyldyń 1 qyrkúıeginen bastap aı saıynǵy memlekettik shákirtaqy ósti: bakalavrıat stýdentterine – 20 paıyzǵa, magıstranttar men doktoranttarǵa – 15 paıyzǵa, kolledj stýdentterine – 50 paıyzǵa. Prezıdent tapsyrmasy boıynsha JOO stýdentteriniń stıpendııasy 2025 jylǵa deıin 2 ese ulǵaıady», - dedi ǵalym.
Maral Qalıevanyń paıymynsha, Ádiletti Qazaqstandy qurý baǵytynda serpindi ıdeıalary bar, naryqtyq ekonomıkanyń erekshelikterin tereń jáne jan-jaqty biletin, básekelestik ortada jumys istegisi keletin, jaýapkershilikti óz moınyna ala alatyn kreatıvti ári bilimdi maman menedjerler qajet.
«Bilim – ǵylymdy, oqý aǵartý isin damytýdyń, qoǵamnyń patrıottyq tárbıesiniń irgeli negizi. Sondyqtan bilim salasy jańǵyrtýshy kúshke ıe jáne el damýynyń mańyzdy ári negizgi baǵyttarynyń biri retinde serpin beredi», - deıdi Memleket tarıhy ınstıtýtynyń bas ǵylymı qyzmetkeri.
Eske salsaq, byltyr qarasha aıynda Prezıdent Qasym-Jomart Toqaev «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasyn iske asyrý jónindegi qaýlyǵa qol qoıǵan edi.
