Bilim salasynda eshqandaı qatelikke jol berýge bolmaıdy – Prezıdent

ASTANA. KAZINFORM – Basqalardyń bala oqytý úlgisin qur kóshirip ákele salýǵa da bolmaıdy. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.

- Bilim sapasyn jaqsarta túsý qajet. Qazir ǵylym men bilim, tehnologııa óte jyldam ózgerip jatyr. Keshe alǵan bilimiń erteń ózekti bolmaı qalýy múmkin. Sondyqtan muǵalimniń bilikti bolýy – óte mańyzdy másele. Joǵary oqý ornynda alǵan bilimmen shektelip qalýǵa bolmaıtyny túsinikti. Ozyq oıly shákirt tárbıeleý úshin ustazdar udaıy izdenip, bilimin jetildirip otyrýy kerek. Balalardyń oqýǵa zeıinin ashatyn ádis-tásilderdi jetik meńgergen abzal, - dedi Prezıdent. 

Qasym-Jomart Toqaev damyǵan memleketterde bilim berý salasy ulttyq ekonomıkanyń tiregi, qozǵaýshy kúshi ekenin aıtty. Sondaı elderdiń tájirıbesin zerttegen jón ekenine nazar aýdartty.

- Biraq basqalardyń bala oqytý úlgisin qur kóshirip ákele salýǵa da bolmaıdy. Ozyq tájirıbeni úırenip, ony elimizdiń bolmysyna beıimdeý kerek. Jalpy, bilim berý standarttaryna, oqytý ádistemesine, oqýlyqqa engiziletin kez kelgen ózgeristi óte muqııat saralaý qajet. Sebebi, bilim salasynda eshqandaı qatelikke jol berýge bolmaıdy. Bir ǵana qateliktiń saldary óte aýyr bolýy múmkin, - dedi Memleket basshysy.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr.