Bilim salasynda býllıng pen kıberbýllınge qarsy kúres qalaı júrip jatyr

ASTANA. KAZINFORM – Jibek Joly telearnasyndaǵy «Búgin LIVE» baǵdarlamasynda QR Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Jomart Qarambaev balalardyń quqyqtaryn qorǵaý salasyndaǵy negizgi problemalar men olardy sheshý baǵytynda qandaı sharalar atqarylyp jatqanyn aıtyp berdi.

Qazirgi tańda balalardyń qaýipsizdigi basty nazardaǵy másele. Degenmen balarǵa qatysty zorlyq-zombylyqtyń balalar quqyǵyna qatysty jıi kóteriletin máselelerdiń biri bolyp otyrǵanyn aıta ketý kerek.

– Býllıng, kıberbýllıng, otbasyndaǵy jáne mekteptegi zorlyq jaǵdaılary áli de ózekti. Budan bólek, osal toptaǵy jáne mıgrant otbasylaryndaǵy balalardyń eńbek quqyǵy jıi taptalady, – dedi Jomart Qarambaev.

Respýblıka boıynsha 40-qa jýyq bala ombýdsmeni jumys isteıdi, olar ulttyq deńgeıdegi sheshimderge usynys beredi.

– Býllıngtiń aldyn alý maqsatynda jańa oqý jylynan bastap barlyq mektepter men kolledjderde «Dos bolaıyq» baǵdarlamasy iske qosyldy. Byltyr pılottyq rejımde baǵdarlamanyń býllıng jaǵdaılaryn 1,5%-ǵa tómendetkeni baıqalǵan, – dedi ol efır barysynda.

Mınıstrlik ókili 2024 jyldan bastap býllıng pen kıberbýllıng úshin ákimshilik jaýapkershilik qarastyrylǵanyn atap ótti. Sońǵy derekter boıynsha bul baǵyt boıynsha 200-den astam is tirkelip, 100-den astam ata-ana jaýapqa tartylǵan.

Internettegi qaýipsizdik máselesine toqtalǵan Qarambaev vedomstvo engizgen «Kıber qadaǵalaý» júıesi qaýipti mazmundy anyqtap, buǵattaıtynyn jetkizdi. Sondaı-aq balalardyń ınternetti qoldanýyn baqylaýǵa baǵyttalǵan «Ata-ana baqylaýy» tetigi de iske qosylyp jatyr.

Aıta keteıik, jyl basynan beri 111 biryńǵaı baılanys ortalyǵyna 111 myńnan astam ótinish túsken.