Bilim men ǵylymǵa júginip, naqty ispen aınalysýymyz qajet - Toqaev
ASTANA. KAZINFORM — Elimizdi kórkeıtemiz desek, osyndaı ult perzentteriniń ómirin, ustanymdaryn úlgi-ónege etýimiz kerek. Bul týraly QR Quryltaıynyń birinshi sessııasynyń ashylýynda Memleket basshysy Qasym-Jomart Toqaev málim etti.
- Biz jasampaz ult retinde aqıqat pen ańyzdyń, shyndyq pen ótiriktiń ara jigin ajyratyp, jaǵymsyz keselderden birjola arylýymyz kerek. Kezinde Uly Abaı aıtqan «bes dushpannan», ásirese, ónbeıtin daý-damaıdan, bos sóz ben qur maqtanýdan aýlaq bolǵanymyz jón. Eń aldymen, bilim men ǵylymǵa júginip, naqty ispen aınalysýymyz qajet. Onsyz álem órkenıetine ilese almaı, kósh sońynda qalyp qoıýymyz múmkin. Biraq biz buǵan jol bermeımiz, - dedi Qasym-Jomart Toqaev.
Prezıdenttiń sózine qaraǵanda, tól tarıhymyzdy tar jol, taıǵaq keshse de, alǵan betinen qaıtpaǵan, eńsesin tik ustap, el múddesine qaltqysyz qyzmet etken tulǵalar jazdy. Olar ultymyzdyń kóshin alǵa bastady.
- Elimizdi kórkeıtemiz desek, osyndaı ult perzentteriniń ómirin, ustanymdaryn úlgi-ónege etýimiz kerek. «Ondaı bolmaq qaıda» dep, qol qýsyryp otyrý – qaharman jurtymyzǵa tán qasıet emes. Rýhy bıik, jigeri myqty adamdar óz otbasy men qasterli Otany aldyndaǵy jaýapkershilikti tereń sezinedi, el ıgiligi úshin adal eńbek etedi. Ómirde tabysty, qoǵamda syıly bolady. Shynaıy otanshyldyq degenimiz de – osy, - dedi Memleket basshysy.
Aıta keteıik, búgin Astanada Prezıdenttiń qatysýymen birinshi shaqyrylymdaǵy QR Quryltaıynyń birinshi sessııasy ashyldy.
