Bilim kúni Aqmola oblysynda 462 mektepte qaýipsizdik sabaǵy ótti
KÓKShETAÝ. KAZINFORM – 1 qyrkúıekte 600-den astam aqmolalyq polıtsııa qyzmetkeri oqýshylar men olardyń ata-analaryna dáris oqydy.
Aqmola oblysy PD baspasóz qyzmetiniń málimetinshe, polıtsııa departamentiniń basshylyq quramy, ıývenaldy polıtseıler, ýchaskelik jáne patrýldik ınspektorlar bilim kúni birinshi jáne on birinshi synyp oqýshylaryna arnalǵan taqyryptyq qaýipsizdik sabaqtaryn ótkizgen.
Kókshetaý qalasyndaǵy №11 mektep – gımnazııasynyń oqýshylaryn bilim kúnimen birinshi PD bastyǵy polkovnık Nursultan Muqashev quttyqtady. Ol óz sózinde polıtsııa tarapynan oqý oryndarynyń qabyrǵalarynda óskeleń urpaqtyń qaýipsizdigin qamtamasyz etý jáne qorǵaý úshin eń tıimdi sharalar qabyldanyp jatqanyn atap ótti.
Bıyl atalmysh mektepte barlyǵy 1 100-den astam oqýshy bilim alatyn bolsa, onyń 83-i alǵash ret mektep tabaldyryǵyn atap otyr. №11 mektep – gımnazııa bul Kókshetaýdaǵy 5-9 synyp oqýshylary kiretin «Jas saqshy» quqyq qorǵaý baǵytyndaǵy 7 synyp uıymdastyrylǵan jalǵyz orta oqý orny. Kadet synyptarynyń biri 2011 jyly qyzmettik mindetterin atqarý kezinde qaza tapqan polıtsııa aǵa serjanty Bolat Qajymovtyń esimimen atalady.
Sonymen birge PD basshysy bıylǵy oqý jylynyń alǵashqy synyp saǵattaryna qatysyp, oqýshylarǵa quqyq buzýshylyqtyń aldyn alý, ásirese tyıym salynǵan zattar men qorqytý derekterin taratýǵa jol bermeý taqyrybynda dáris oqydy.
«Jalpy, bul kúni Aqmola oblysynyń 462 mektebinde osyndaı qaýipsizdik sabaǵy ótti. Óskeleń urpaqty patrıottyq tárbıeleý jáne polıtsııa qyzmetiniń bedelin arttyrý maqsatynda kóshede patrýldik polıtsııanyń qyzmettik avtokólikterin kórsetý jáne polıtsııa batyrlarymen, memlekettik nagradalardyń ıegerlerimen kezdesýler uıymdastyryldy. Demalys kezinde birqatar aldyn alý sharasy júrgizildi. Atap aıtqanda, óńirdiń barlyq oqý oryny tekserildi, olardyń tehnıkalyq jaraqtandyrylýy, onyń ishinde beınekameralar men dabyl túımeleri tekserildi. Mektepter men mektepke deıingi bilim berý mekemelerdiń janynda jaıaýlar jolynyń jaı-kúıi tekserilip, qosymsha jol belgileri, jasandy kólik kedergileri, baǵdarshamdar ornatyldy. Buǵan qosa, óńirde «Nazar aýdaryńyz, balalar! Jedel aldyn alý sharasy ótip jatyr», - dedi vedomstvodan.
Aıta ketsek, budan buryn «Mektepke jol» aktsııasy barsynda 21 myńǵa jýyq aqmolalyq oqýshy kómek alǵanyn jazǵan edik.
