Bilim granttarynyń sany bes jylda 40 paıyzdan astam ósti
ASTANA. KAZINFORM — Úkimet jastardyń sapaly bilim alýǵa qoljetimdiligin keńeıtý boıynsha aýqymdy sharalar keshenin júzege asyryp otyr. Sońǵy bes jylda bilim berý granttarynyń sany 65,1 myńnan 93,2 myńǵa deıin ulǵaıdy. Osylaısha, myńdaǵan jastar joǵary oqý oryndarynda tegin oqýǵa múmkindik aldy. Bul týraly Úkimettiń baspasóz qyzmeti málim etti.
Qosymsha arnaıy qoldaý baǵdarlamalary iske asyrylyp jatyr. Jekelegen óńirlerdiń jastary úshin qosymsha granttar bólinedi, jergilikti atqarýshy organdar, «Qazaqstan halqyna» qory, bıznes-qoǵamdastyq jáne joǵary oqý oryndarynyń ózderi arqyly bilim alý múmkindikteri usynylady.
Úkimettiń habarlaýynsha, stýdentterge áleýmettik qoldaýdy arttyrý boıynsha jumystar júrgizilip jatyr. Sońǵy jyldary memlekettik shákirtaqylardyń mólsheri aıtarlyqtaı ulǵaıtyldy.
— 2020 jylmen salystyrǵanda bakalavrıat stýdentteriniń shákirtaqysy eki esege ósip, 26,2 myń teńgeden 52,4 myń teńgege jetti. Al pedagogıkalyq mamandyqtarda bilim alyp júrgen stýdentterdiń shákirtaqysy 42 myń teńgeden 84 myń teńgege deıin kóbeıdi. Osy kezeńde magıstranttar men doktoranttardyń shákirtaqysy 1,75 esege artty, — delingen habarlamada.
Stýdentterdiń oqýyna qolaıly jaǵdaı jasaý mańyzdy baǵyttardyń biri bolyp qala beredi. Tek 2025 jyly 10 myńnan astam orynǵa arnalǵan 30 jańa jataqhana paıdalanýǵa berildi. Sonymen qatar memleket ata-ana qamqorlyǵynsyz qalǵan stýdentter men I jáne II toptaǵy múgedektigi bar stýdentterdiń jataqhanada turý shyǵyndaryn óteıdi.
Aıta keteıik, úsh aýysymdy mektepter azaıyp, balabaqsha kezegi qysqardy.
