Bilim granttaryn «Dıplommen aýylǵa» baǵdarlamasymen baılanystyrý artyq – Qanat Bozymbaev
ASTANA. KAZINFORM – Bilim granttaryn «Dıplommen aýylǵa» baǵdarlamasymen baılanystyrý artyq. Bul týraly búgin Senattyń jalpy otyrysynda Premer-mınıstrdiń orynbasary Qanat Bozymbaev aıtty.
«Dıplommen aýylǵa» baǵdarlamasy jas mamandardy aýyldyq aýmaqtarǵa tartýǵa baǵyttalǵan. Negizgi sharalar: bir jolǵy tólemder jáne úı alý ne salý úshin kredıtter. Joba aıasynda agroónerkásiptik keshendi damytý maqsatynda kóbine veterınarlar, agronomdar, mal jáne orman sharýashylyǵy mamandary suranysqa ıe. Olarǵa bıýdjettik kredıtter berilip jatyr. Al jergilikti atqarýshy organdar kadr qajettiligin ózderi qalyptastyrady. Qandaı mamandar qajet ekenin biledi, taldaý jasaıdy.
- Eńbek naryǵynyń qajettiligi jylyna birneshe ret aıqyndalyp, túzetilip otyrady. Memlekettik bilim granttaryn «Dıplommen aýylǵa» baǵdarlamasymen baılanystyrý búginde artyq dep oılaımyn. Óıtkeni bala ýnıversıtetke túsip, 4 jyl oqıdy. Al sol ýaqytta aýylda atalǵan qojalyq jumys isteı me, istemeı me, maman qajet bola ma? Óıtkeni 4 jyl ishinde qajetti maman keletin shyǵar, - dedi Qanat Bozymbaev senatorlardyń saýalyna oraı.
Vıtse-premer aýyldaǵy bızneske «Dıplommen aýylǵa» jobasy arqyly emes, basqa baǵdarlamalar arqyly jeńildikter ázirleýge bolatynyn aıtty.
- Bul baǵytta jumys isteımiz, - dedi Úkimet basshysynyń orynbasary.
Osy oraıda Senat spıkeri Máýlen Áshimbaev birneshe baǵdarlamany qarap, kerek bolsa biriktirýdi nemese úılestirilýin kúsheıtýdi usyndy.
Sondyqtan aldaǵy ýaqytta birneshe uqsas baǵdarlamany qarap, biriktirip, ońtaılandyrý jáne áleýmettik qosymsha tetikterdi engizý qajet sııaqty. Osy baǵytta saraptaýlardy júzege asyrǵan oryndy bolar edi dep esepteımiz, - dedi palata tóraǵasy.
Qanat Bozymbaev mundaı usynysqa qoldaý bildirdi.
- Qoldaımyn, tıisti saraptama júrgizemiz. Sodan keıin Parlamentke kelip tıisti tásilder engizemiz, - dedi ol.
Aıta keteıik, búgin palata otyrysynda Qanat Bozymbaev Senattyń bir top depýtatynyń depýtattyq saýalyna aýyzsha jaýap berdi.