Bilim grantynyń sany emes sapasy men kólemi ósedi

ASTANA. KAZINFORM – 2025 jyldan memlekettik bilim grantynyń sany emes sapasy men kólemi arttyrylady. Bul týraly «Jibek Joly» telearnasynyń «Ýáde» baǵdarlamasyna suhbat bergen Ǵylym jáne joǵary bilim mınıstri Saıasat Nurbek aıtty.

«Granttardyń sany ulǵaıyp kele jatyr. Onyń ózindik úrdisi, tártibi bar. Biz demografııalyq ósimde aldyn ala qaperge alýymyz qajet. Sondyqtan granttardyń sanyn jyl saıyn sál ósirip otyramyz. Biraq, kelesi jyldan bastap granttardyń sanyn emes, sapasy men kólemin ulǵaıtamyz. Granttardyń quny jyl saıyn arttyrylady», -dedi mınıstr.

Onyń atap ótýinshe, búginde memlekettik bilim grantynyń qosymsha 4 tetigi ázirlendi. Olar: saralanǵan grant, «Ulttyq qor – balalarǵa!» jobasy, paıyzsyz nesıe júıesi, «Keleshek» jınaqtaýshy» júıesi.

«Bizdegi basty maqsat – UBT-da shekti balldan joǵary ball jınaý. Mamandyq ta, ýnıversıtet te mańyzdy emes. Tańdaý jasaımyz, biraq, grantqa iligý – basty maqsat. Shetelde talapker armandaǵan joǵary oqý ornyn jáne mamandyq tańdaıdy. Oǵan erte daıyndalady. Bizde joǵary ball alǵan talapker qalaǵan mamandyqqa túse alamyn dep oılaıdy. Halyqaralyq, qatynastar, halyqaralyq quqyq, stomatologııany tańdaıdy. Nemese dene shynyqtyrý mamandyǵyn qup kóredi. Óıtkeni, oǵan shyǵarmashylyq emtıhanmen qabyldanady jáne 1 kýrstan keıin basqa mamandyqqa aýysyp ketýge múmkindik bar. Aıtalyq, 115, 120 ball jınaǵan bala az grant berilgen, konkýrs óte joǵary mamandyqty tańdaıdy. Bir mysal keltire keteıin. Bıyl stomatologııaǵa 30 grant bóldik. Bir grantqa 35 adam talasty. Al granttardyń basym bóligi pedagogıka, ınjenerııa, aqparattyq tehnologııa, veterınarııa, orman, aýyl sharýashylyǵy, jylý energetıkasy syndy memleketke qajetti mamandyqtarǵa berildi. ıAǵnı, kásiptik baǵyttaý júıesimiz áli túzelgen joq, júıege keltire almadyq», - dedi mınıstr.