Bilim grantynyń nátıjesi búgin shyǵady: talapkerler neni bilýi kerek
ASTANA. KAZINFORM — 2026-2027 oqý jylyna arnalǵan memlekettik bilim granty ıegerleriniń tizimi búgin saǵat 15:00–de jarııalanady. Bıyl konkýrsqa shamamen 127 myń talapker qatysyp, bakalavrıat baǵdarlamalary boıynsha 75 myńǵa jýyq memlekettik bilim granty bólindi. Bul týraly Joǵary jáne joǵary oqý ornynan keıingi bilim komıteti tóraǵasynyń orynbasary Janna Esinbaeva Jibek Joly telearnasynyń «Búgin LIVE» baǵdarlamasynda málimdedi.
Bıyl memlekettik bilim granttarynyń basym bóligi eńbek naryǵynda suranysy joǵary mamandyqtaryna berildi. Granttardyń 60 paıyzy ınjenerlik-tehnıkalyq baǵyttarǵa, 20 paıyzy pedagogıkalyq mamandyqtarǵa, qalǵan 20 paıyzy ózge bilim berý baǵyttaryna bólingen.
Konkýrsqa qatysýshylar arasynda «Aýdarma isi», «Halyqaralyq qatynastar», «Quqyq», «Psıhologııa», «Qarjy» jáne pedagogıkalyq mamandyqtarǵa suranys joǵary boldy.
Janna Esinbaevanyń aıtýynsha, bıyl konkýrsqa qatysýshylar sany ótken jylmen salystyrǵanda edáýir artqan.
— Bıylǵy ótinishter sany byltyrmen salystyrǵanda 14 myńǵa kóp. Bul eń aldymen mektep túlekteri sanynyń artýyna baılanysty. Keıbir mamandyqtar boıynsha bir orynǵa 47 talapkerge deıin talasty. Eń joǵary báseke sport menedjmenti, sporttaǵy densaýlyq jáne jattyqtyrýshylar daıarlaý baǵyttarynda baıqaldy. Dástúrli túrde quqyq pen qarjy mamandyqtaryna 10-12 adamnan, jýrnalıstıkaǵa 7-8 adamnan kelip otyr, — dedi Janna Esinbaeva.
Onyń aıtýynsha, memlekettik granttardy bólý kezinde eńbek naryǵynyń suranysy eskeriledi.
— Jyl saıyn memlekettik bilim berý granttarynyń sanyn shyǵararda Eńbek mınıstrliginiń boljamyna súıenemiz. Qazirgi tańda tehnıkalyq jáne aqparattyq-kommýnıkatsııalyq tehnologııalar salasyna suranys joǵary. Sondyqtan granttardyń 60 paıyzy osy baǵyttarǵa bólindi. Odan keıin pedagogıkalyq mamandyqtar, qalǵan bóligi ózge salalarǵa qarastyryldy, — dedi komıtet tóraǵasynyń orynbasary.
Konkýrs barysynda zańnamada kózdelgen jeńildik sanattary da eskerilgen.
— Memlekettik bilim berý tapsyrysynyń 57 paıyzy kvotalyq sanattarǵa beriledi. Onyń ishinde aýyl jastaryna 35 paıyz kvota qarastyrylǵan. Sonymen qatar kópbalaly jáne tolyq emes otbasynan shyqqan talapkerlerge, múgedektigi bar azamattarǵa, jetim balalarǵa jáne qandastarǵa zańnamaǵa sáıkes kvotalar bólinedi, — dedi Janna Esinbaeva.
Komıtet tóraǵasynyń orynbasary grant konkýrsynyń nátıjeleri búgin saǵat 15:00–de Ǵylym jáne joǵary bilim mınıstrliginiń, mınıstr Saıasat Nurbektiń Telegram arnasynda jáne Ulttyq testileý ortalyǵynyń resmı aqparattyq resýrstarynda jarııalanatynyn aıtty.
Onyń aıtýynsha, grant ıegerleri 10-25 tamyz aralyǵynda qajetti qujattaryn joǵary oqý oryndaryna tapsyrýǵa tıis. Al 10-12 tamyz kúnderi jergilikti atqarýshy organdar bóletin shamamen 2 myń grantqa konkýrs ótedi. Budan bólek áleýmettik qoldaýdy qajet etetin talapkerlerge arnalǵan granttar men jumys berýshiler usynatyn bilim berý granttaryna da qujat tapsyrýǵa múmkindik bar.
Aıta keteıik, buǵan deıin, 821 talapker 130 baldan joǵary nátıje kórsetkeni jaıly jazǵan edik.
