Bilim grantyna ótinish bergender sany 127 myńǵa jýyqtady
ASTANA. KAZINFORM — Bilim berý granttaryn taǵaıyndaý konkýrsyna qatysý úshin 127 myńǵa jýyq talapker ótinish berdi, dep habarlaıdy QR ǴJBM Ulttyq testileý ortalyǵynyń baspasóz qyzmeti.
Bul ótken jylmen salystyrǵanda 14 myńǵa artyq. 2025 jyly konkýrsqa qatysý úshin 113 myń ótinish qabyldanǵan bolatyn.
Esterińizge salsaq, bıyl bakalavrıatqa túsý úshin 75 myńnan astam grant bólinip otyr. Granttardyń basym bóligi (60%) ınjenerlik baǵyttaǵy mamandyqtarǵa, 20% — pedagogıkalyq mamandyqtarǵa, 20% — basqa salalarǵa eńbek naryndaǵy qajettilikti eskere otyryp berildi.
Sońǵy birneshe jyl boıy eń suranysqa ıe bilim berý baǵyttary boıynsha talapkerlerdiń tańdaýy ózgerissiz qalyp otyr. Ótinishterdiń kópshiligi «Injenerlik, óńdeý jáne qurylys salalary», «Pedagogıkalyq ǵylymdar» jáne «Aqparattyq-kommýnıkatsııalyq tehnologııalar» sııaqty baǵyttarǵa berildi. Qabyldaý naýqanynyń nátıjesine sáıkes bolashaq aýdarmashylar, dıplomattar, zańgerler, psıhologtar jáne muǵalimder arasynda bir granttyq orynǵa eń úlken konkýrs kútiledi.
— Granttar taǵaıyndaý jónindegi sheshimdi Respýblıkalyq konkýrstyq komıssııa qabyldaıdy. Onyń quramyna memlekettik organdardyń jáne qoǵamdyq uıymdardyń ókilderi, qoǵam belsendileri kiredi, — delingen habarlamada.
Aıta keteıik, grant ıegerleriniń tizimi 10 tamyzǵa deıin jarııalanady. Al joǵary oqý oryndaryna qabyldaý 25 tamyzda aıaqtalady.
Budan buryn áskerı kolledj túlekteri UBT-syz áskerı ınstıtýtqa túse alatynyn jazdyq.
