Bilim grantyn ıelený úshin UBT-nyń eń tómengi baly jarııalandy

Qujatqa sáıkes, bilim berý grantyn taǵaıyndaý konkýrsyna qatysý nemese aqyly bólimge túsý úshin joǵary oqý ornynyń sanaty men daıarlaý baǵytyna qaraı UBT-nyń eń tómengi shekti baly saqtalady.

Atap aıtqanda, ulttyq joǵary jáne joǵary oqý ornynan keıingi bilim berý uıymdaryna túsý úshin talapkerler keminde 65 ball jınaýy tıis. Onyń ishinde:
«Pedagogıkalyq ǵylymdar» baǵyty boıynsha – 75 ball;
«Densaýlyq saqtaý» baǵyty boıynsha – 70 ball;
«Quqyq» baǵyty boıynsha – 75 ball;
«Aýyl sharýashylyǵy jáne bıoresýrstar» men «Veterınarııa» baǵyttary boıynsha – keminde 50 ball.

Aǵymdaǵy kúntizbelik jyly qurylǵan jáne bilim berý qyzmetine lıtsenzııa alǵan jańa ulttyq joǵary oqý oryndary úshin eń tómengi shek 50 ball bolyp belgilendi. Degenmen pedagogıkalyq, medıtsınalyq jáne zań mamandyqtaryna túsý kezinde burynǵydaı joǵary talaptar saqtalady: tıisinshe 75, 70 jáne 75 ball. Qalǵan joǵary oqý oryndary úshin de eń tómengi ótý baly 50 ball deńgeıinde qalady. Biraq pedagogıkalyq, medıtsınalyq jáne zań baǵyttaryndaǵy bilim berý baǵdarlamalaryna túsýshiler úshin joǵary shekti baldar qoldanylady.

Qujatqa sáıkes, 2026 jylǵy 1 qyrkúıekten bastap talapkerler joǵary oqý ornyna qosymsha emtıhannan sátti ótken nemese oqý orny talapkerlerdiń reıtıngtik nátıjelerin eskere otyryp ózi belgileıtin ótý balyn jınaǵan jaǵdaıda ǵana qabyldanady. Sonymen qatar «Qazaqstan tarıhy» páni, eki beıindik pán jáne shyǵarmashylyq emtıhan boıynsha keminde 5 ball, al «Oqý saýattylyǵy» men «Matematıkalyq saýattylyq» pánderi boıynsha keminde 3 ball jınaý mindetti.

Ózgerister qysqartylǵan bilim berý baǵdarlamalaryna túsýshilerge de qatysty. Kolledj túlekteri UBT nátıjesi boıynsha keminde 25 ball, al «Pedagogıkalyq ǵylymdar» baǵytyna túsý úshin keminde 35 ball jınaǵan jaǵdaıda bilim berý granttary konkýrsyna qatysa alady. Bul rette UBT-nyń ár páni men shyǵarmashylyq emtıhannan keminde 5 ball alý qajet.

UBT-ny elektrondyq formatta tapsyrylǵan jaǵdaıda talapker belgilengen talaptarǵa sáıkes keletin eki testileý nátıjesiniń bireýimen konkýrsqa qatysa alady.

Qujatta merzimdi áskerı qyzmet ótkergen azamattardy qabyldaý tártibi de naqtylanǵan. Olar áskerı qyzmetten keıingi eki jyl ishinde «Pedagogıkalyq ǵylymdar» baǵytyn qospaǵanda, UBT tapsyrmaı-aq áńgimelesý nátıjesi boıynsha aqyly negizde joǵary oqý oryndaryna túse alady. Osyndaı tártip qysqartylǵan bilim berý baǵdarlamalaryna qabyldaý kezinde de qoldanylady.

Joǵary oqý oryndary qosymsha, arnaıy nemese shyǵarmashylyq emtıhandar aıaqtalǵan kúni olardyń nátıjelerin Ulttyq testileý ortalyǵynyń tsıfrlyq júıesine engizýge mindetti. Qujattardy qabyldaý aıaqtalǵannan keıin joǵary oqý ornynyń basshysy oqýǵa qabyldaý týraly buıryq shyǵarady.

Munan bólek, atalǵan buıryqpen magıstratýra boıynsha bilim berý baǵdarlamalaryna qabyldaýdyń úlgilik qaǵıdalaryna da ózgerister engizildi.
Buǵan deıin UBT-ny almastyratyn jańa emtıhan modeli ázirlenip jatqanyn jazǵan edik.