Bilim granty ıegerleriniń tizimi 7 tamyzda jarııalanady
ASTANA. KAZINFORM — Ǵylym jáne joǵary bilim mınıstri Saıasat Nurbek memlekettik bilim berý granttaryn taǵaıyndaý konkýrsynyń qorytyndylary 7 tamyz kúni saǵat 15.00-de jarııalanatynyn aıtty.
Búgin 2026-2027 oqý jylyna arnalǵan memlekettik bilim berý granttaryn taǵaıyndaý jónindegi Respýblıkalyq komıssııanyń otyrysy ótti.
— Komıssııa quramynda qoǵam qaıratkerleri, memlekettik organdardyń, bilim salasy kásipodaqtarynyń, «Atameken» ulttyq kásipkerler palatasynyń, joǵary oqý oryndary qaýymdastyǵynyń jáne qoǵamdyq uıymdardyń ókilderi jumys istedi. Komıssııa otyrystarynda úmitkerlerdiń ótinishteri qaralyp, memlekettik bilim berý granttaryn bólý qoldanystaǵy erejeler negizinde konkýrs tártibimen júzege asyryldy. Sapaly jáne qajyrly qyzmeti úshin komıssııa múshelerine sheksiz alǵysymdy bildiremin, — dedi mınıstr
Bıyl konkýrsqa qatysý úshin 127 myńnan astam ótinish qabyldandy. Talapkerlerdiń basym bóligi «Pedagogıkalyq ǵylymdar», «Injenerlik, óńdeý jáne qurylys salalary» jáne «Aqparattyq-kommýnıkatsııalyq tehnologııalar» baǵyttaryn tańdady.
Mınısrdiń málimetinshe, qabyldaý naýqanynyń qorytyndysy boıynsha bolashaq aýdarmashylar, dıplomattar, zańgerler, psıhologtar men pedagogter daıarlaıtyn bilim berý baǵdarlamalary arasynda bir granttyq orynǵa básekelestik eń joǵary bolady.
Memlekettik bilim berý granttaryn taǵaıyndaý konkýrsynyń qorytyndylary 2026 jylǵy 7 tamyz kúni saǵat 15.00-de tómendegi negizgi ári resmı aqparat kózderinde jarııalanady.
Aıta keteıik, joǵary oqý oryndaryna qujat qabyldaý 2026 jylǵy 25 tamyzǵa deıin jalǵasady. Sondaı-aq grant konkýrsynyń qorytyndysyn myna resmı aqparat kózderinen kórýge bolady.
