«Bilim berýdegi tsıfrlyq ınnovatsııalar»: Jambyl oblysynda dástúrli tamyz keńesi ótti
TARAZ. KAZINFORM – Jambyl oblysynda «Bilim berýdegi tsıfrlyq ınnovatsııalar» taqyrybynda dástúrli tamyz pedagogıkalyq keńesi ótti.
Basqosýǵa oblys ákimi, Parlament Májilisiniń, oblystyq máslıhat depýtattary, quqyq qorǵaý jáne atqarý organdarynyń, qala, aýdan ákimderiniń orynbasarlary, kásipodaq uıymdary, azamattyq qoǵam ókilderi, sala ardagerleri men qyzmetkerleri qatysty.
20 myńnan astam pedagog keńesti tikeleı efır arqyly tamashalady.
Jıynǵa qatysýshylar aldymen ustazdar men oqýshylardyń ınnovatsııalyq jobalary qoıylǵan kórmeni tamashalady.
Konferentsııa oqý-aǵartý mınıstri Ǵanı Beısembaevtyń beıne-quttyqaýymen ashyldy.
Keńeste oblys ákimi bilim salasyndaǵy máselelerge toqtalyp, jańa oqý jylyndaǵy negizgi maqsat-mindetterdi naqtylap berdi. Erbol Qarashókeev jaýaptylarǵa ınfraqurylymdy jetildirý, tsıfrlandyrý, kásibı biliktilikti arttyrý, balalar qaýipsizdigi jáne taǵy basqa baǵyttar boıynsha jumystardy qatań baqylaýda ustaýdy tapsyrdy.
Shara barysynda aımaq basshysy bilim berý júıesin damytyp, jetildirýge eleýli úles qosqan pedagogterge qurmet kórsetti. Atap aıtqanda, birqatar úzdik ustazdarǵa oqý-aǵartý mınıstrliginiń «Eńbek ardageri» medali, «Y. Altynsarın», «Bilim berý isiniń qurmetti qyzmetkeri» tósbelgileri, sondaı-aq oblys ákiminiń Qurmet gramotasy men Alǵys haty tabystaldy.
Budan bólek, Merki aýdany T.Qojakeev atyndaǵy №39 mektep- gımnazııasy «Orta bilim beretin úzdik uıym - 2024» grantyn jeńip, 68 mıllıon teńgeniń sertıfıkatyna ıe boldy.
Joǵary nátıje kórsetken Jambyl ınnovatsııalyq joǵary kolledji (10 mln.teńge) men 6 bilim berý uıymyna (1 mln.teńge) qarjylaı sertıfıkat tapsyryldy.
Daryndy balalarǵa arnalǵan mamandandyrylǵan «Daryn» lıtseı-ınternatynyń ujymy men úsh mektepke deıingi bilim berý uıymyna 500 myń teńgelik aqshalaı syılyq tabystaldy.
Basqosýda oblystyń bas ustazy Raýan Sadyrqulov bilim basqarmasynyń qurylǵanyna 85 jyl tolýyna oraı salanyń damýy, atqarylǵan jumystar men ózekti máselelerdi sheshý joldaryna jan-jaqty baıandady.
Sonymen birge «Órleý» biliktilikti arttyrý ulttyq ortalyǵy» aktsıonerlik qoǵamynyń basqarma tóraǵasy Aıdana Shilibekova, Jambyl ınnovatsııalyq joǵary kolledjiniń arnaıy pán oqytýshysy Álisher Júnisov, Qazaqstan jasandy ıntellekt assotsıatsıasynyń sarapshysy Aıbek Nurtazaev, QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti basshysynyń birinshi orynbasary Dáýren Omarov, «Jambyl oblysy bilim jáne ǵylym qyzmetkerleriniń jergilikti kásiptik odaǵy» qoǵamdyq birlestiginiń tóraǵasy, oblystyq máslıhattyń depýtaty Erulan Maǵzymbekov sóz sóıledi.
