«Myń kóshbasshy» baǵdarlamasynyń 20 qatysýshysy jaıly mektep dırektory boldy
ASTANA. KAZINFORM - Memleket basshysynyń bastamasymen júzege asqan «Bilim berýdegi ózgeristerdiń myń kóshbasshysy» jobasy sátti jalǵasýda. Búgingi tańda irikteý men daıyndyqtyń barlyq kezeńinen ótken 136 qatysýshy dırektor bolyp taǵaıyndaldy. Onyń ishinde 20 dırektor jaıly mektepterdi basqarady.
Bıyl jobanyń ekinshi kezeńi júzege asýda. Jyl basynan beri mektepke deıingi, orta, tehnıkalyq jáne kásiptik bilim berý uıymdarynda eńbek etetin pedagogterden 13 796 ótinim qabyldanǵan. Testileý nátıjesi boıynsha kelesi kezeńge 900-ge jýyq úmitker ótti. Olar pedagogıkalyq sheberlik ortalyǵynda «Ózgeris kóshbasshylary: zamanaýı bilim berý uıymyn basqarýǵa jańa kózqaras» taqybyry aıasynda oqytýdan ótýde. Ári qaraı áńgimelesý túrinde irikteýdiń sońǵy kezeńi uıymdastyrylady. Іrikteýdiń barlyq 5 kezeńinen ótken qatysýshylar respýblıkalyq kadr rezervine alynady.
«Oqýdan, taǵylymdamadan jáne áńgimelesýden ótken úmitkerlerge sertıfıkat beriledi. Sonyń negizinde odan ári jumysqa ornalasý úshin olar kadr rezervine engiziledi. Rezervtegiler birinshi basshynyń bos laýazymyna konkýrstyq rásimderden ótpeı taǵaıyndalady. Atap óteıik, barlyq kezeńderden sátti ótip, sertıfıkat alǵandarǵa «basshy-kóshbasshy» biliktilik sanaty beriledi», - dep atap ótti Orta bilim komıtetiniń tóraǵasy Qanybek Jumashev.
Eske salaıyq, QR Oqý-aǵartý mınıstrligi Memleket basshysynyń tapsyrmasymen 2023 jyldan bastap Prezıdenttik jastar kadrlyq rezerviniń úlgisimen bilim berýdegi ózgeristerdiń kóshbasshylaryn irikteý jáne daıarlaý jónindegi jobany iske asyrýda.
Úmitkerler 8 aı boıy quzyrettilikti baǵalaý, úsh deńgeıli oqytý, elimizdiń jetekshi mektepterinde taǵylymdamadan ótý, qorytyndy baǵalaý jáne mınıstrlik janyndaǵy komıssııamen áńgimelesýden ótedi. Rezervke qabyldanǵan jańa býyn basshylary kadr máselesin sheshýge óz úlesin qosady, sonymen qatar jańa mektepterdi, onyń ishinde «Jaıly mektep» ulttyq jobasy aıasynda salynyp jatqan mektepterdi de basqarýǵa quzyretti bolady.
