«Bilim berýdegi ózgeristerdiń 1000 kóshbasshysy» jobasy boıynsha 428 maman oqýdy aıaqtady
ASTANA.KAZINFORM — 2023 jyldan beri elimizde «Bilim berýdegi ózgeristerdiń 1000 kóshbasshysy» strategııalyq jobasy iske asyrylyp jatyr.
Memleket basshysynyń tapsyrmasy boıynsha júzege asyp jatqan joba basqarýshylardyń jańa býynyn qalyptastyrýǵa baǵyttalǵan.
Prezıdenttik jastar kadr rezerviniń úlgisinde jasalǵan joba nátıjesinde 2023-2024 jyldary 583 pedagog rezervıst atandy. Onyń 400-den astamy konkýrssyz basshylyq qyzmetke taǵaıyndalsa, 40 dırektor «Keleshek mektepteri» Ulttyq jobasy aıasynda ashylǵan mektepterdi basqaryp otyr. Osylaısha, Qazaqstandaǵy mektep dırektorlarynyń tapshylyǵy úsh esege qysqardy.
Joba jalǵasyn taýyp 2025 jyly taǵy 428 úmitker oqýdan ótýde. Pedagogıkalyq sheberlik ortalyǵynda mektep dırektorlarynyń orynbasarlaryn oqytý 21 shildede bastalyp 12 qyrkúıekte aıaqtaldy. Bilim berýdegi ózgeris kóshbasshylary birneshe kezeń boıy iriktelip, úsh deńgeıde biliktiligin arttyrdy. Sonyń ishinde bazalyq deńgeıden bastap, saraptamalyq, kásibı daıyndyq deńgeıine deıin ártúrli baǵdarlamalar qamtylǵan. Bul oqý baǵdarlamalary mektepti tıimdi basqarýǵa qajetti daǵdylardy jetildirýge baǵyttalǵan.
Bolashaq mektep dırektorlaryn oqytýǵa arnaıy daıyndyqtan ótken, sertıfıkattalǵan trenerler tartyldy. Olar mektep basshylaryń biliktiligin arttyrýda 12 jyldan astam tájirıbesi bar, atalǵan baǵdarlama boıynsha Kembrıdj Baǵalaý keńesiniń sertıfıkattaryna ıe mamandar.
Oqytý protsesi aıaqtalǵan soń, qatysýshylar tájirıbeden ótýge jiberildi. Endi 15-26 qyrkúıek aralyǵynda qorytyndy baǵalaý júrgizilip, bolashaq dırektorlar halyqaralyq tájirıbe negizinde baǵalanady. Tıisti testileý men joba jumystarynan, portfolıo men refleksıvti esepten sátti ótken úmitkerler Oqý-aǵartý mınıstrligi janyndaǵy komıssııamen áńgimelesýge jiberiledi. Osydan soń júzden júırik, myńnan tulpar shyqqan mamandar kadrlyq rezervke engizilmek.
«Bilim berýdegi ózgeristerdiń 1000 kóshbasshysy» jobasyn sátti aıaqtaǵan jáne kadr rezervine kirgen mamandar konkýrstyq rásimderden ótpeı-aq birinshi basshynyń bos ornyna taǵaıyndalady.
Aıta ketelik Oqý-aǵartý mınıstrligine jańa fýnktsııalar júkteldi.