Bilim berý júıesine jasandy ıntellekt quraldaryn engizýdiń ulttyq saıasaty ázirlenedi
ASTANA. KAZINFORM – Jasandy ıntellekt tehnologııalaryn paıdalana otyryp, jańa býyndaǵy tsıfrlyq oqýlyqtar ázirlenip jatyr. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Bilim berý júıesinde jasandy ıntellektini damytý jáne engizý boıynsha jumystar Jasandy ıntellektini damytýdyń 2024–2029 jyldarǵa arnalǵan tujyrymdamasy men Mektepke deıingi, orta, tehnıkalyq jáne kásiptik, joǵary bilim men ǵylymdy damytýǵa arnalǵan 2023 - 2029 jyldarǵa arnalǵan tujyrymdamaǵa sáıkes júzege asyrylyp jatyr. Qazir Oqý-aǵartý mınıstrligi bilim berý júıesine jasandy ıntellekt quraldaryn engizýdiń maqsattaryn, qaǵıdattary men deńgeılerin aıqyndaıtyn ulttyq saıasatty ázirlep jatyr. Osy baǵytta jańartylǵan bastaýysh jáne orta bilim berýdiń memlekettik jalpyǵa mindetti standartyna jasandy ıntellekt elementterin, quzyrettilikke negizdelgen tásildi jáne STEM baǵyttaryn ıntegratsııalaý boıynsha ózgerister engizdi, - dedi Oljas Bektenov jaýabynda.
Úkimet basshysynyń atap ótýinshe, búginde ártúrli tsıfrlyq platformalarda (mysaly, AI Kitap, MyIDP, TopIQ.kz) jasandy ıntellekt tehnologııalaryn paıdalana otyryp, jańa býyndaǵy tsıfrlyq oqýlyqtar ázirlenip jatyr. Bul oqýlyqtar tapsyrmalardy avtogeneratsııalaý, mazmundy jekelendirý, uǵymdardy vızýalızatsııalaý jáne oqýshylardyń jeke erekshelikterine beıimdeý sııaqty múmkindiktermen tolyqtyrylady.
- Onyń ústine oqý materıaldarynyń qurylymyn, termınologııasyn jáne formatyn avtomatty túrde saraptaýǵa múmkindik beretin jasandy ıntellekt algorıtmderi ázirlenip, engizilip jatyr. Jasandy ıntellektini jan-jaqty qarastyrý maqsatynda ІT-salasynyń sarapshylarynyń, ǵalymdardyń, pedagog praktıkterdiń qatysýymen jumys toby quryldy. Osy oraıda jasandy ıntellektini bilim berý salasyna engizý boıynsha zertteýler júrgizilip, tsıfrlyq etıketti qalyptastyrýǵa baǵyttalǵan ádistemelik quraldar ázirlenetin bolady, - dedi ol.
Aıta keteıik, elimizde segiz sala boıynsha mamandar daıarlaý úshin JI qoldanatyn kásibı standart ázirlenip jatyr.