Bilim berý júıesinde JI-di engizý jol kartasy ázirlenetin boldy

ASTANA. KAZINFORM – QR Premer-mınıstri Oljas Bektenov Oqý-aǵartý mınıstrligine bilim berý júıesine jasandy ıntellektini engizý jónindegi Jol kartasyn ázirleýdi tapsyrdy.

— Osy jyldyń 1 qazanyna deıin Bilim berý júıesinde jasandy ıntellektini engizý jónindegi 2025-2029 jyldarǵa arnalǵan Tujyrymdamalyq tásilder men Jol kartasy qabyldanýǵa tıis. Olar normatıvtik quqyqtyq bazany, oqý-ádistemelik qamtamasyz etýdi, pedagogterdi daıarlaý men qaıta daıarlaýdy, aqparattyq qaýipsizdikti ázirleý jónindegi sharalardy qamtýy kerek, — dedi ol Úkimet otyrysynda.

Sondaı-aq Bektenov óńirlerde zaman talabyna saı mektepterdi salýdy, olardy joǵary jyldamdyqty ınternetpen, tsıfrlyq bilim berý resýrstarymen qamtamasyz etýdi tapsyrdy. 

— Oqý-aǵartý mınıstrligi, «Samuryq-Qazyna» qory óńir ákimdikterimen birlesip, jeltoqsan aıyna deıin qalǵan 52 Keleshek mektepteriniń qurylysyn aıaqtaýy qajet. Óńir ákimdikterimen birlesip, «Aýyl mektebi — sapa alańy» shaǵyn jınaqty mektep modelin kezeń-kezeńmen engizýdi jalǵastyrý qajet. Olardy joǵary jyldamdyqty Internetpen, tsıfrlyq bilim berý resýrstarymen qamtamasyz etý, qashyqtan oqytýdy uıymdastyrý, sondaı-aq pedagogterdi tıisti daǵdylarǵa daıyndaý jóninde naqty sharalar kózdelýge tıis. Ákimdiktermen birlesip, óńirlerde, sonyń ishinde jeke ınvestıtsııalardy tarta otyryp, «Sana» jańa býyn ortalyǵynyń tujyrymdamasy men tásilderin keń aýqymda qoldaný qajet, — dedi Úkimet basshysy.

Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.

Sondaı-aq Joldaýda Qazaqstanda jasandy ıntellekt jáne tsıfrlyq damý mınıstrligi qurylatyny aıtyldy.