Bilim berý uıymdaryndaǵy medıtsına qyzmetkerleriniń aılyǵyn kóterýge 90 mlrd teńge bólinedi
ASTANA. KAZINFORM — Memleket jeke menshik mektepterge 136 mlrd teńgeniń tapsyrysyn beredi. Bul týraly Oqý-aǵartý mınıstri Juldyz Súleımenova Májilistiń jalpy otyrysynda aıtty.
2026-28 jyldarǵa arnalǵan respýblıkalyq bıýdjet jobasyn talqylaý kezinde bilim salasyna bólinetin qarajattyń qazirgi deńgeıinen azaıyp qalǵany sóz boldy.
— Bilim berýge arnalǵan shyǵystyń jospardaǵy qysqarýy bıylǵy deńgeımen salystyrǵanda 600 mlrd teńge eken. Shyǵystyń bir bóligin jergilikti bıýdjetke berý pedagogterdiń aılyǵyn ósirmeı tastamaı ma, — dep surady depýtat Nurgúl Taý.
Mınıstr Juldyz Súleımenova bıyl «Keleshek» mektepterin salýǵa qomaqty qarajat bólingendikten bilim salasyndaǵy shyǵys úlken bolǵanyn. Joba aıaqtalyp jatqandyqtan kelesi jyly shyǵystyń qysqarýy zańdylyq ekenin aıtty.
— Siz aıtyp otyrǵan 660 mlrd teńgeniń qysqarý qarjynyń qysqarýy emes. 300 mlrd teńgege jýyq qarjy «Keleshek» jobasynyń aıasynda salynǵan mektepterdiń qurylysy aıaqtalýyna baılanysty qysqardy. Qalǵan 300 mlrd teńgeden astam qarajat jalpy transfert retinde jergilikti bıýdjetterge júktelip otyr. Onyń ishinde balabaqsha, mektep, kolledjdegi medıtsınalyq qyzmetkerlerdiń aılyǵyn kóterýge 90 mlrd teńge, jeke menshik mektepterge memlekettik tapsyrys boıynsha 136 mlrd teńgeden astam qarajatty jergilikti bıýdjetter bóledi. Kolledj stýdentteriniń stıpendııasyn kóterýge 85 mlrd teńgege jýyq qarajat jergilikti bıýdjet esebinen qarastyrylyp otyr. Bul bıýdjetti ortalyqsyzdandyrý aıasyndaǵy shara, — dedi mınıstr.
Aıta ketý kerek. 2024 jyly jeke menshik mektepter memleketten185 mlrd teńgeniń tapsyrysyn alǵan bolatyn.