Bilim berý uıymdarynda «Zań jáne tártip» quqyqtyq saýattylyq aılyǵy bastaldy
ASTANA. KAZINFORM — Qazaqstanda 8 qańtardan bastap «Adal azamat» birtutas tárbıe baǵdarlamasy aıasynda «Zań jáne tártip» quqyqtyq saýattylyq aılyǵy ótip jatyr. Oǵan elimizdegi barlyq bilim berý uıymdarynyń oqýshylary men kolledj stýdentteri qatysady. Bul týraly Oqý-aǵartý mınıstrligi málim etti.
Bul shara bilim alýshylar arasynda quqyqtyq mádenıetti kóterý, quqyq buzýshylyqtardyń aldyn alý jáne quqyqqa degen qurmetti qalyptastyrýǵa baǵyttalǵan.
— Aılyq aıasynda zań normalaryn túsindirý, quqyq buzýshylyqtyń saldary týraly aqparattandyrý baǵytynda bilim berý uıymdarynda túrli kezdesýler, dárister, dóńgelek ústelder, trenıngter jáne ózge de is-sharalar uıymdastyrylady. Ótkiziletin sharalar barysynda ýákiletti organdardyń ókilderimen birge bilim alýshylarǵa quqyq buzýshylyq túrleri men oǵan qatysty jaýapkershilik týraly keń kólemde túsindirý jumystary júrgiziledi, — dep habarlady vedomstvodan.
Qoǵamda quqyqtyq tártip pen zań ústemdigin nyǵaıtý — memlekettik saıasattyń mańyzdy baǵyttarynyń biri. Osy oraıda Qazaqstan Úkimeti Qoǵamda zań jáne tártip ıdeologııasyn ilgeriletý jónindegi 2025-2030 jyldarǵa arnalǵan tujyrymdamany bekitken bolatyn.
Quqyqtyq saýattylyq aılyǵy aıasynda uıymdastyrylatyn is-sharalar tujyrymdamada qarastyrylǵan mindetterdiń praktıkalyq iske asýynyń bir bóligi.
