Bilim berý uıymdaryna erekshe baqylaý men qadaǵalaý júıesi engiziledi - Bektenov
ASTANA. KAZINFORM — Osy jyldyń 1 aqpanynan barlyq bilim berý uıymyna «tosynnan tekserý» qaǵıdaty boıynsha erekshe baqylaý men qadaǵalaý júıesi engiziledi. Bul týraly búgin Úkimet otyrysynda Premer-mınıstr Oljas Bektenov aıtty.
- Búginde Qazaqstanda shamamen 7 mıllıon bala ósip keledi. ıAǵnı, halyqtyń úshten bir bóliginen astamyn balalar qurap otyr. Naqty aıtsaq – 34 paıyz. Elimizdiń bolashaǵy otanshyl, jasampaz urpaq tárbıesine tikeleı baılanysty. Sondyqtan da Memleket basshysy Ulttyq quryltaıda «Qazaqstan balalary» biryńǵaı tujyrymdamasyn ázirleýdi tapsyrdy. Balalarǵa jan-jaqty qamqorlyq jasaý – bizdiń basty basymdyqtarymyzdyń biri. Bul oraıda memleket óskeleń urpaqtyń ómir sapasyn jaqsartý úshin keshendi sharalardy qabyldap keledi, - dedi Úkimet basshysy.
Onyń aıtýynsha, «Qazaqstan balalary» tujyrymdamasynda bilim berý, densaýlyq saqtaý, qaýipsizdik, áleýmettik qamsyzdandyrý jáne otbasynyń ál-aýqaty salasynda balalardyń quqyqtaryn qorǵaý jónindegi naqty is-sharalar jospary qamtylǵan.
- Sońǵy jyldary zańnamalyq baza aıtarlyqtaı keńeıtildi. Ásirese, balalarǵa qatysty qylmystyq áreketter úshin jazanyń bultartpas qaǵıdaty qatań saqtalatyn bolady. Otbasy máseleleri, áıelder men balalardyń quqyqtaryn qorǵaý boıynsha 111 biryńǵaı baılanys ortalyǵy iske qosyldy. Oǵan júgingen jaǵdaıda mindetti túrde kómek kórsetilip, tekserý sharalary júrgiziledi, - dedi ol.
Premer-mınıstrdiń atap ótýinshe, barlyq óńirde bala quqyqtary jónindegi óńirlik ýákilder jumys isteıdi. Olar bala quqyqtarynyń saqtalýyn baqylaıdy ári balalar men otbasylarǵa kómek kórsetedi.
- 1 aqpannan bastap barlyq bilim berý uıymdaryna «tosynnan tekserý» qaǵıdaty boıynsha erekshe baqylaý men qadaǵalaý júıesi engiziledi. Bul balalardy saýyqtyrý, olardyń qaýipsizdigi men tamaqtaný máselelerine qatysty. Densaýlyq saqtaý, Oqý-aǵartý, Mádenıet, Eńbek jáne áleýmettik qorǵaý, Týrızm jáne Іshki ister mınıstrlikterine ákimdiktermen birlesip, osy jyldyń 30 qańtaryna deıin erekshe baqylaý men qadaǵalaýǵa jatatyn nysandar tizilimin daıyndaýdy tapsyramyn, - dedi Oljas Bektenov.
Buǵan deıin Juldyz Súleımenova «Qazaqstan balalary» tujyrymdamasyn tanystyrǵanyn jazǵan edik.