Bilim berý uıymdary aldyn ala eskertýsiz tekseriledi
ASTANA. KAZINFORM – Qazaqstanda memlekettik bıýdjetten qarjylandyrylatyn, balalar bolatyn nysandardy aldyn ala eskertýsiz tekserýge múmkindik beretin memlekettik baqylaýdyń erekshe tártibi engizildi. Bul týraly QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málim etti.
Ortalyq kommýnıkatsııalar qyzmetinde ótken baspasóz máslıhatynda ol jańa tártip tıisti nysandardyń qaýipsizdigin memlekettik baqylaýdy kúsheıtýge múmkindik bergenin aıtty.
– Endi nysandarǵa baryp monıtorıng júrgizýge, sondaı-aq aldyn ala habarlamaı tekserýge bolady. Bıyl maýsym aıynda osy tártip aıasynda bilim berý uıymdarynyń jańa oqý jylyna daıyndyǵyna monıtorıng júrgizildi, – dedi Sarhat Beısenova.
Monıtorıng mektepterdiń 99 paıyzyn, mektep ashanalarynyń 95 paıyzyn, medıtsınalyq pýnktterdiń 96 paıyzyn jáne mektep-ınternattardyń 99,2 paıyzyn qamtydy.
Monıtorıng nátıjesinde kóptegen nysanda sanıtarııalyq-epıdemıologııalyq talaptardyń buzylǵany anyqtaldy. Komıtet tóraǵasynyń aıtýynsha, onyń bir bóligin bilim berý uıymdary jańa oqý jylyna daıyndyq kezinde óz kúshimen joıa alady. Bul úshin qomaqty qarjy qajet emes.
Memlekettik baqylaýdyń erekshe tártibin kózdeıtin zańǵa Memleket basshysy 2025 jylǵy 4 jeltoqsanda qol qoıdy. Jańa tártip 2026 jylǵy 1 aqpannan bastap qoldanysqa engizildi.
– Jańa oqý jyly qarsańynda bilim berý uıymdarynyń sanıtarııalyq-epıdemıologııalyq jaǵdaıyna, ǵımarattar men ınjenerlik jelilerdiń, ashanalar men medıtsınalyq pýnktterdiń qaýipsizdigine erekshe nazar aýdarylyp otyr, – dedi ol.
Aıta keteıik, buǵan deıin elimizdegi 2 myńnan astam mektep ashanasynda sanıtarııalyq-epıdemıologııalyq talaptardyń buzylǵany anyqtalǵanyn jazǵan edik.
