Bilim berý-saýyqtyrý qyzmetterin elektrondyq lıtsenzııalaý júıesi engiziledi
ASTANA. KAZINFORM – Bıyl 1 sáýirden bastap kámeletke tolmaǵandarǵa bilim berý-saýyqtyrý qyzmetterin usynatyn uıymdar lıtsenzııalaýdan ótedi. Bul týraly Májilis depýtattarynyń saýalyna Premer-mınıstrdiń orynbasary – Ulttyq ekonomıka mınıstri Serik Jumanǵarınniń jaýabynda aıtylǵan.
- Tarıhı-mádenı mura obektilerin qorǵaý jáne bilim berý-saýyqtyrý qyzmetteri máseleleri jónindegi zańǵa sáıkes 2026 jylǵy 1 sáýirden bastap kámeletke tolmaǵandarǵa bilim berý-saýyqtyrý qyzmetterin usynatyn uıymdar (lıtsenzııanyń merzimi – 5 jyl) lıtsenzııalaýǵa jatady. Bilim berý uıymdarynyń bilim berý qyzmetine qoıylatyn biliktilik talaptaryna, bilim berý-saýyqtyrý baǵdarlamalaryna, pedagog qyzmetkerlerge, materıaldyq-tehnıkalyq jaraqtandyrýǵa, sanıtarııalyq-epıdemıologııalyq qorytyndynyń bolýyna, balalardyń bolý jaǵdaılaryna, tamaqtandyrýdy uıymdastyrýǵa, medıtsınalyq qyzmet kórsetýge jáne qaýipsizdikti qamtamasyz etýge qatysty jańa talaptar qosý bóliginde tolyqtyrýlar engizilip jatyr, - dedi vıtse-premer.
Onyń atap ótýinshe, «Bastaýysh, negizgi orta, jalpy orta, tehnıkalyq jáne kásiptik, orta bilimnen keıingi bilim berý, dinı bilim berý, kámeletke tolmaǵandarǵa bilim berý-saýyqtyrý qyzmetteri salasynda bilim berý qyzmetimen aınalysýǵa lıtsenzııa berý» memlekettik qyzmetin kórsetý qaǵıdalaryna bilim berý-saýyqtyrý qyzmetterin elektrondyq lıtsenzııalaý júıesin engizý boıynsha ózgerister engizilip jatyr.
- Budan bólek, baǵdarlamalardyń qurylymy men mazmunyna qoıylatyn biryńǵaı talaptardy belgileıtin jáne balalar demalys ortalyqtaryn lıtsenzııalaýdyń negizi bolyp tabylatyn Bilim berý-saýyqtyrý baǵdarlamalaryn bekitý qaǵıdalarynyń, qosymsha bilim berý uıymdary qyzmetiniń úlgilik qaǵıdalarynyń jobalary habarlamalyq jáne lıtsenzııalyq tártiptiń arajigin qamtıtyn jańa redaktsııada ázirlendi. Osylaısha, bilim berý-saýyqtyrý qyzmetteriniń sapasyn arttyrý boıynsha júıeli sharalar qabyldanýda, - dedi Serik Jumanǵarın.
Buǵan deıin Májilis depýtaty Nurgúl Taý balalar lagerlerin lıtsenzııalaýdy 2026 jyldyń jazyna deıin tolyq engizý máselesin kótergen edi.
