Bilim berý salasynyń qyzmetkerleri JI-di qoldaný boıynsha oqytýdan ótti

ASTANA. KAZINFORM — QR Oqý-aǵartý mınıstrliginiń bastamasymen bilim berý salasynyń qyzmetkerleri jasandy ıntellektini qoldaný boıynsha oqytýdan ótti. Oqytý «Bilim berýdegi aımaqtyq kóshbasshylyq: ınnovatsııalar jáne árekettegi jasandy ıntellekt» kásibı damý baǵdarlamasy aıasynda uıymdastyryldy. Bul týraly QR Oqý-aǵartý mınıstrligi jazdy. 

Atalǵan baǵdarlama bıylǵy jyldyń aqpan aıynan bastap iske asyrylýda. 

Maqsaty — tsıfrlyq transformatsııa jáne jasandy ıntellekt tehnologııalaryn engizýde bilim berý júıesi basshylarynyń strategııalyq oılaýyn, kóshbasshylyq jáne basqarýshylyq quzyrettilikterin damytý.

— Baǵdarlama tyńdaýshylary retinde Oqý-aǵartý mınıstrliginiń ortalyq apparatynyń, óńirlik basqarmalar men bilim bólimderiniń 74 basshysy, sondaı-aq elimizdiń barlyq óńirlerinen mektep, balabaqsha jáne kolledj dırektorlary qatysty. Atalǵan baǵyt bilim berý júıesiniń negizgi syn-qaterlerine biryńǵaı kózqaras qalyptastyrýǵa jáne praktıkalyq basqarýshylyq sheshimder ázirleýge múmkindik berdi, — delingen aqparatta.

Baǵdarlama taqyryptary kóshbasshylyq quzyrettilikterdi damytý, strategııalyq josparlaý, TjKB transformatsııasy jáne bilim berýge jasandy ıntellektini engizý tájirıbelerin qamtydy. Sonymen qatar, pedagogıkalyq hakaton ótkizilip, óńiraralyq komandalar bilim berý sapasyn arttyrý jáne jasandy ıntellektini qoldaný boıynsha praktıkalyq jobalar ázirledi.

— Baǵdarlama nátıjesinde praktık-menedjerlerdiń qaýymdastyǵy qurylyp, óńirlik deńgeıde iske asyrylatyn jobalar daıyndaldy, sondaı-aq oqytý men basqarýda jasandy ıntellektini saýatty paıdalanýǵa arnalǵan ádistemelik materıaldar toptamasy ázirlendi, — dep jazdy mınıstrlik.

Mınıstrlik JI muǵalimdi almastyra almaıtynyn, ol tek qural ekenin aıtty.