Bilim berý salasyndaǵy JI qyzmetin retteıtin zań kerek — Májilis spıkeri

ASTANA. KAZINFORM — Májilis tóraǵasy Erlan Qoshanov jasandy ıntellektini damytýǵa arnalǵan parlamenttik tyńdaýda bilim berý salasyndaǵy JI qyzmetin zańmen retteý qajettigin atap ótti. 

— Qazir bilim berý salasynda, ásirese mektepte jasandy ıntellektti qoldaný máselesi keńinen talqylanyp jatyr. Qoǵam ekige qaq jaryldy — jaqtaýshylar da, qarsy tarap ta bar. Jasandy ıntellekt naqty bilimdi almastyra ma degen qorqynysh jıi aıtylady. Áleýmettik suraqtarǵa sáıkes pikirler ártúrli. Saýalnamaǵa qatysqandardyń 40,5 paıyzy jasandy ıntellekttiń áserin oń baǵalasa, 37 paıyzy teris qabyldaıtynyn aıtqan. JI oqýdy tym jeńil etip, materıaldy meńgerý ústirt sıpat alady dep saqsynatyndar bar.

Munyń bári aqylǵa qonymdy shekteýler men jańa tehnologııalardy paıdalaný erkindigi arasyndaǵy durys tepe-teńdikti tabýdyń qanshalyqty mańyzdy ekenin rastaıdy, — dedi ol.

Onyń paıymdaýynsha, jasandy ıntellekt muǵalimdi almastyrmaıtynyn, kómekshi ekenin durys túsiný kerek.

— Bul oqytýdy tıimdirek etýge kómektesedi. Alaıda, negizgi bilim men synı oılaýdy damytý adamnyń qolynda qalady.

Sondyqtan, osynaý sezimtal salada bilim sapasy men qaýipsizdigin qamtamasyz etetin naqty erejeler qajet. Meniń oıymsha, bul da zań deńgeıinde rettelýi kerek, — dedi Erlan Qoshanov.

Buǵan deıin Jasandy ıntellekt jáne tsıfrlyq damý mınıstrligi jańa logotıpin tanystyrǵanyn jazǵan edik.