Bilim berý salasyndaǵy memlekettik qoldaý jekemenshik mektepterdi de qamtıdy
ASTANA. KAZINFORM — Memlekettik mektepter jelisin damytýymen qatar, Qazaqstanda bilim berýdiń qoljetimdiligin qamtamasyz etýge jeke sektordyń qatysýyna jaǵdaı jasalyp otyr. Bul týraly Úkimettiń baspasóz qyzmeti málim etti.
— Negizgi quraldardyń biri — memlekettik bilim berý tapsyrysy. Onyń arqasynda qarjylandyrý bilim berý uıymynyń menshik nysanyna qaramastan balalardy oqytýǵa baǵyttalady. Bul sapaly bilimge qoljetimdilikti keńeıtýge, qosymsha oqýshy oryndaryn qurýǵa jáne bilim berý ınfraqurylymyn damytýǵa jeke ınvestıtsııalardy tartýǵa múmkindik beredi, — delingen habarlamada.
Mańyzdy kezeńderdiń biri — memlekettik bilim berý tapsyrysyn qarjylandyrý júıesin tsıfrlandyrý boldy. 2025 jyldan bastap qarjylandyrý úderisterin tsıfrlyq formatqa kóshirý boıynsha pılottyq joba júzege asyrylýda. Onyń maqsaty — bıýdjet qarajatyn bólýdiń ashyqtyǵyn qamtamasyz etý, bilim alýshylardy esepke alýdyń dáldigin arttyrý jáne memlekettik qarjylandyrýdyń paıdalanylýyna baqylaýdy kúsheıtý.
— Búgingi kúni joba aıasynda e-Qazyna platformasynda 6 325 mektep tsıfrlandyryldy, onyń ishinde 5 443-i memlekettik mektepter. Osylaısha, tsıfrlyq júıe tek memlekettik emes, sonymen qatar memlekettik bilim berý tapsyrysyn júzege asyrýǵa qatysatyn jekemenshik bilim berý uıymdaryn da qamtıdy. Jańa tetikterdi engizý bilim alýshylar kontıngentin esepke alýdy avtomattandyrýǵa, derekterdi qalyptastyrý kezinde adamı faktordyń áserin azaıtýǵa jáne bilim berý uıymdary arasynda bıýdjet qarajatyn obektıvti bólýdi qamtamasyz etýge múmkindik beredi. Nátıjesinde memlekettik resýrstardy paıdalaný tıimdiligi artyp, eldegi memlekettik te, jekemenshik te bilim berý ınfraqurylymyn odan ári damytý úshin qosymsha jaǵdaılar jasalady, — dep habarlady Úkimetten.
Aıta keteıik, úsh aýysymdy mektepter azaıyp, balabaqsha kezegi qysqardy.
