Bilim berý nysandaryndaǵy tamaqtan ýlaný jaǵdaıy 4 ese tómendedi
ASTANA. KAZINFORM - Qazaqstanda 2026 jyldyń jeti aıynda bilim berý nysandaryna baılanysty tirkelgen tamaqtan ýlaný jaǵdaılarynyń sany tórt esege azaıdy. Mundaı nátıjege Memleket basshysynyń tapsyrmasyn oryndaý aıasynda balalar bolatyn nysandarǵa memlekettik baqylaýdy kúsheıtý nátıjesinde qol jetkizildi.
QR Densaýlyq saqtaý mınıstrligi baspasóz qyzmetiniń habarlaýynsha, 2025 jyldyń jeti aıynda 8 jaǵdaı tirkelip, 118 bala zardap shekken. 2026 jyldyń osy kezeńinde 2 jaǵdaı tirkelip, 13 bala zardap shekti.
Mańǵystaý oblysyndaǵy bilim berý nysandarynda tamaqtan ýlanýmen baılanysty toptyq aýrý jaǵdaılarynan keıin memleket balalardyń densaýlyǵyn saqtaýǵa baǵyttalǵan qosymsha sharalar keshenin qabyldady.
2025 jylǵy 4 jeltoqsanda Memleket basshysy memlekettik bıýdjetten qarjylandyrylatyn balalar bolatyn nysandarǵa memlekettik baqylaýdyń erekshe tártibin kózdeıtin Zańǵa qol qoıdy. Jańa tetik 2026 jylǵy 1 aqpannan bastap qoldanysqa engizildi.
Bul balalar bolatyn nysandarda sanıtarııalyq talaptardyń saqtalýyna baqylaýdy kúsheıtýge jáne yqtımal qaýipterdi ýaqtyly anyqtaýǵa múmkindik berdi.
2025 jylǵy 1 qyrkúıekten bastap bilim berý uıymdarynda Tamaqtaný standarty jáne birneshe nusqadan turatyn úlgilik perspektıvalyq mázir qoldanylady.
Qujattar balalardyń durys ári teńgerimdi tamaqtanýynyń zamanaýı qaǵıdattaryn eskere otyryp ázirlengen. Bul rette ónimderdiń qaýipsizdigine, olardy saqtaý jáne daıyndaý jaǵdaılaryna erekshe nazar aýdarylady.
-Balalardyń qaýipsizdigi – memlekettiń sózsiz basymdyǵy. Memleket basshysynyń tapsyrmasyn oryndaý úshin balalar bolatyn nysandarǵa baqylaýdy kúsheıtip, mekteptegi tamaqtanýdy uıymdastyrýǵa qoıylatyn talaptardy arttyryp jatyrmyz. Bizdiń mindetimiz – buzýshylyqtarǵa jaýap berip qana qoımaı, qaýipterdiń aldyn alý. Balanyń syrqattanýynyń bir ǵana jaǵdaıynyń ózi tekserý júrgizýdi jáne qajetti sharalardy qabyldaýdy talap etetinin aıta ketý kerek,-delingen habarlamada.
Sondaı-aq onda sanıtarııalyq-epıdemıologııalyq qyzmettiń óńirlermen jáne bilim berý uıymdarymen birlesken jumysy jalǵasyp jatqany aıtylǵan.
Balalardyń qaýipsizdigi, mektepterdiń sanıtarııalyq-epıdemıologııalyq salamattylyǵy jáne mekteptegi tamaqtanýdyń sapasy máseleleri Densaýlyq saqtaý mınıstrliginiń turaqty baqylaýynda.
Osyǵan deıin Almaty oblysynda 70-ten astam mektepte myńnan astam bala ystyq tamaqpen qamtamasyz etilmegeni týraly jazdyq.
