Bilim berý nesıesine kepildik berý týraly 2023 jyldan beri ótinim túspegen
ASTANA. KAZINFORM – Qazaqstanda stýdentterdiń oqý aqysyn tóleýge arnalǵan bank nesıelerine memlekettik kepildik berý tetigi bar. Alaıda keıingi jyldary bul júıe boıynsha jańa kepildik rásimdelmegen. Bul týraly «Qarjy ortalyǵy» AQ Kazinform agenttiginiń resmı saýalyna bergen jaýabynda málimdedi.
«Qarjy ortalyǵy» – bilim berý salasyndaǵy ýákiletti organnyń operatory. Ol stýdentterge tikeleı nesıe bermeıdi, bankter usynatyn bilim berý nesıelerine kepildik beredi.
– Suraý salynǵan kezeńde Kepilgerdiń mekenjaıyna Kredıtorlardan kepildikter berýge ótinimder túsken joq, soǵan baılanysty 2023 jyldan bastap 2026 jylǵa deıingi kezeńde kepildik mindettemeler berilmedi, – delingen resmı jaýapta.
Ortalyqtyń málimetinshe, kepildik berý júıesi boıynsha Qazaqstan Halyq Banki, ForteBank, Nurbank jáne Bereke Bank-pen kelisim jasalǵan.
Qoldanystaǵy tártip boıynsha stýdent bilim berý nesıesin alý úshin aldymen bankke júginedi. Bank ótinishti qarap, kepildik alý úshin qajetti qujattardy ortalyqqa joldaıdy.
Memlekettik kepildik nesıeniń árbir berilgen bóligi boıynsha negizgi qaryz somasynyń 100 paıyzyn qamtıdy. Biraq aıyppuldar men ósimpuldar oǵan kirmeıdi. Bul kepildik stýdentti nesıeni qaıtarý mindetinen bosatpaıdy.
Kepildik berý tártibi Ǵylym jáne joǵary bilim mınıstriniń 2023 jylǵy 27 sáýirdegi №189 jáne Oqý-aǵartý mınıstriniń 2023 jylǵy 24 qazandaǵy №320 buıryqtarymen bekitilgen qaǵıdalarǵa sáıkes retteledi.
Buǵan deıin Úkimettiń 2026–2029 jyldarǵa arnalǵan halyq tabysyn arttyrý josparynda bilim berý nesıelerine kepildik berý júıesin jetildirý kózdelgenin jazǵan edik.
