Bilim berý nesıesin kimder ala alady
ASTANA. KAZINFORM — Qazaqstanda oqý aqysyn tóleýge arnalǵan bilim berý nesıesi ýnıversıtet stýdentterimen ǵana shektelmeıdi. Bul týraly «Qarjy ortalyǵy» AQ Kazinform agenttiginiń resmı saýalyna bergen jaýabynda málimdedi.
«Qarjy ortalyǵy» — bilim berý salasyndaǵy ýákiletti organnyń operatory. Ol stýdentterge tikeleı nesıe bermeıdi, bankter usynatyn bilim berý nesıelerine kepildik beredi.
Ortalyqtyń málimetinshe, memlekettik kepildik berý tártibi Ǵylym jáne joǵary bilim mınıstriniń 2023 jylǵy 27 sáýirdegi № 189 jáne Oqý-aǵartý mınıstriniń 2023 jylǵy 24 qazandaǵy № 320 buıryqtarymen bekitilgen qaǵıdalarǵa negizdelgen.
— Memleket kepildigimen bilim berý kredıtteri tehnıkalyq jáne kásiptik bilim berý baǵdarlamalary (kolledjder), orta bilimnen keıingi bilim berý baǵdarlamalary (joǵary kolledjder men ýchılışeler), joǵary bilim berý baǵdarlamalary (bakalavrıat, ınternatýra) jáne joǵary oqý ornynan keıingi bilim berý baǵdarlamalary (magıstratýra, rezıdentýra, doktorantýra) boıynsha bilim alýshylarǵa beriledi, — delingen resmı jaýapta.
Bilim berý nesıesin 18 jasqa tolmaǵan talapkerler de rásimdeı alady. Biraq bul úshin ata-anasynyń nemese ózge zańdy ókiliniń jazbasha kelisimi qajet.
Al turaqty tabysy joq stýdentterdiń nesıe alý múmkindigin bank jeke baǵalaıdy. Ol ótinish berýshiniń nesıe tarıhyn, burynǵy qaryzdary boıynsha bereshegin jáne tabysyn rastaıtyn qujattardy tekseredi.
Bank qajet dep tapsa, stýdentpen birge qaryzdy óteýge jaýap beretin taǵy bir adamdy tartýdy talap ete alady. Osylaısha, bilim berý nesıesi ártúrli deńgeıde oqıtyndarǵa arnalǵan. Alaıda ony rásimdeý úshin banktiń talaptaryna saı bolý qajet.
Buǵan deıin elimizde jeńildetilgen bilim berý nesıesi qarastyrylǵanyn jáne 2025 jyldan bastap «Keleshek» bilim berý jınaqtaý júıesi iske qosylǵanyn habarlaǵan edik.
